“Ҳаётимдаги энг унутилмас Янги йил”. Байрамни машинада, касалхонада ва молхонада кутган машҳурлар (фото, видео)

Ҳаётингизда Янги йил байрами билан боғлиқ қандай хотираларингиз бор? Бу саволга ўзбек шоу-бизнес вакиллари қуйидагича жавоб беришди.

Жамшид Умрзоқов: “Акам совға қилган ўйинчоқни қўмсайман”

— Аслида ҳар бир янги йил унутилмас воқеаларга бой бўлади. Чунки йилнинг 365-куни ҳамиша ўзига хос бўлади ва эртаси кундан бошлаб ҳаёт янги саҳифага ўтгандек оппоқ қоғоздан бошланади. Болалигимдан ҳайвонлар қиёфасидаги ўйинчоқларга қизиқардим. Сирожиддин акам орзумдаги ўйинчоқни совға қилганида жуда хурсанд бўлгандим. Аммо февралга бормай акам пластмасса ўйинчоқни тишлаб, узун бурунча ҳосил қилганди. Ҳозир ҳам ана шу ўйинчоқни қўмсайман, аммо унга ўхшашини учратганим йўқ.

Оилада 9 та фарзанднинг кенжасиман. Ота уйим Пискентда бўлгани учун оила аъзоларимни олиб, Янги йилни яқинлар билан кутиб олардик. Ўйлаб қарасам, ҳаётимдаги энг унутилмас Янги йил онам билан қаршилаганларимиз бўлган экан. У кунларни қўмсайман, қандайдир қувонч билан эслайман, — дейди Жамшид Умрзоқов.

Нигина Анорбоева: “Қизим улғайса, байрам ўзгача бўлади”

— Ўйлаб қарасам, барча Янги йил оқшомини оила даврасида кутиб олганман. Ҳаммаси ўзи хос бўлган. Яқинда она бўлдим, ҳозир қизалоғим уч ойлик бўлди. Насиб қилса, келаси йил анча улғайиб қолади ва у учун атайин байрамга тайёргарлик кўрамиз. Умид қиламанки, келаси Янги йил ҳаммасидан ўзгача ўтади, — дейди Нигина Анорбоева.

Қиличбек Мадалиев: “Унутилмас байрамлар отам билан боғлиқ”

— Унутилмас байрамларнинг барчаси отам раҳматли билан боғлиқ. Болалигимизда бу байрам ҳам ўзгача ўтарди. Укам ҳам анча кичик эди, отам раҳматли дастурхон бошида ўтирарди.

Ҳозир ҳам байрам куни қаерда хизматда бўлишимдан қатъи назар, байрам бошланишидан бир неча дақиқа олдин бўлса-да, уйга қайтаман. Чунки байрам оила билан файзли ўтади, — дейди Қиличбек Мадалиев.

Ситора Фармонова: “Байрамни касалхонада кутиб олганмиз”

— Айнан Янги йил оқшомидаги укам сабаб қўлимни эшик қисиб қолган. Аввалига оғриқ ўтиб кетар деб ўйлаганман. Аммо бармоқларим соат сайин шишиб, оғриқ ортаверган. Шундан кейин Янги йилга бир соат қолганида касалхонага боришимизга тўғри келган. “Шу куни тинч ўтирмадингларми?” деб шифокорлар бармоғим синганини айтишганди. Хуллас, гипс қилдириб уйга қайтгунимизга қадар Янги йил кириб бўлганди. Бу ҳаётимдаги энг оғриқли ва саргузаштга бой Янги йил байрами бўлган, — дейди Ситора Фармонова.

Ёрқинхўжа Умаров: “Уйдагилар мени ташлаб кетишган”

— Саккиз йил олдин ишдан эртароқ келиб, уйдагилар билан Янги йилни кутиб оламан десам, ҳеч ким уйда йўқ. Улар менга айтмай, меҳмонга кетишган экан. Аксига олиб, ортимга ҳам қайтиб кетолмай қолганман. Чунки 10 дақиқадан сўнг байрам кириши керак эди. Хуллас, уйга кириб, мандарин еб Янги йилни кутиб олганман. Ҳозирча ҳаётимдаги энг унутилмас Янги йил шу бўлган, — дейди Ёрқинхўжа Умаров.

Элмурод Ҳақназаров: “Салют сабаб қўйларни ўғирлаб кетишган”

— Уч-тўрт йил олдин байрам куни болаларни қувонтирай деб салют сотиб олганман. Соат ўн иккига бонг урганида оилавий кўчага чиққанмиз. Салютни отиб уйга кирсак, молхонадаги иккита қўйни “уриб” кетишибди. Маҳалла нозири келган, хуллас йил баённома тузиш билан бошланган, — дейди Элмурод Ҳақназаров.

Шоҳруххон: “Байрамни машинада кутиб олганмиз”

— Ҳаётимдаги энг унутилмас Янги йил икки йил аввал содир бўлди. Туркиядаги концертим сабаб оиламни ҳам ўзим билан олиб кетдим. Концерт 31 декабрда бўлди, уни ўтказиб оилам билан машинада кетаётгандик. Аксига олиб, тирбанд йўлда қолиб кетдик ва оилам билан байрамни машинада кутиб олишимизга тўғри келди, — дейди Шоҳруххон.

Дилшод Назаров: “Онамнинг туғилган кунини нишонлаймиз”

— Шу кунгача нечта Янги йил байрамини нишонлаган бўлсам, ҳаммаси ўзига хос ўтган. Чунки бу кун оиламизда қўшалоқ байрам. Онам ҳам айнан Янги йил оқшомида дунёга келган. Баъзан Янги йил йўқ, деган гапларни эшитиб қолсам биз байрамни эмас, онамнинг шукрона кунларини нишонлаяпмиз, деб кулиб қўяман, — дейди Дилшод Назаров.

Озода Нурсаидова: “Байрамни аэропортда кутганмиз”

— Ҳаётимдаги энг унутилмас Янги йилни 2002 йили кутиб олганман. Ўшанда рейс қолдирилгани учун аэропортда қолиб кетганмиз. Ҳамманинг кайфияти ёмон бўлса-да, терминалда ўзимизча байрам ташкиллаштирганмиз. Санъаткорларнинг ҳаётида бундай унутилмас байрамлар кўп бўлади. Чунки улар ҳамиша хизматда. Байрам куни бемалол дам олиб ўтирганимни эслолмайман. Ҳамиша бир тадбирдан, иккинчисига шошамиз. Баъзан Янги йилни йўлда кутиб олган пайтларимиз ҳам бўлади, — дейди Озода Нурсаидова.

Улуғбек Раҳматуллаев: “Байрам куни ухлаб қолганман”

— Байрамни ҳеч қачон ёмон хотиралар билан эсламаслик керак. Қувончли кундан ҳамиша халқ хизматида эканлигимдан хурсандман. Аммо бир йил чарчаб, ухлаб қолганман. Эрталаб уйғонсам, Янги йил аллақачон кириб бўлган экан, — дейди Улуғбек Раҳматуллаев.

Видеони тўлиқ ҳолда томоша қилинг: