«Мавсум хитлари» тақдимот маросими йил йили ўтказилиб, энг яхши ижодкорларни тақдирлайди. Бу йилги маросимда ҳам кўплаб таниқли санъаткорлар билан бирга ёш ижрочилар ҳам тақдирланди. «Дарё» мухбирлари тақдирлаш маросимида иштирок этиб, фото ва видеорепортаж тайёрлашди.
Ташкилотчиларнинг таъкидлашича, тақдимотдан аввал номзодлар рўйхати эълон қилинган ва энг кўп овоз тўплаган иштирокчилар ғолибликни қўлга киритган.
Тақдимот маросимининг илк ғолиби Ёрқинхўжа Умаров бўлди. У бошқа хонандалардан фарқли равишда жонли ижрода қўшиқ куйлади.
— Бу йил тақдирланмаганимда ҳам хафа бўлмасдим. Чунки қўшиғим хит бўлди. Шунинг ўзи ҳам катта ютуқ, — дейди хонанда Ёрқинхўжа Умаров.
Бу йил сермаҳсул ижод қилган Достонбек Эргашев ҳам «Кўзмунчоғим» қўшиғи учун тақдирланди.
Жасурбек Мавлонов ва Гулинур эса «Жайлан» қўшиғи ва клипи учун тақдирланди.
— Дуэт куйлашимизни маъмурларимиз таклиф қилишган. Қўшиқнинг муваффақияти фақатгина хонандага боғлиқ эмас. Клипни яратган Суннат Намозовнинг ҳам ҳиссаси катта. — дейди хонанда Жасурбек Мавлонов.
Хонанда Муниса Ризаева бу йил бешинчи маротаба «Мавсум хитлари» тақдимот маросимида тақдирланди. «Етмадими» қўшиғи унга навбатдаги ғалабани олиб келди.
— Бу йил у қадар жўшқин ижод қилолмадим. Чунки соғлиғим бироз панд берди. Ҳозир ҳам саҳнага иситмалаган аҳволда чиқдим, — дейди хонанда Муниса Ризаева.
Ёш хонанда Жамбул Муҳаммедов «Кабутар» қўшиғи учун «Мавсум хитлари»да ғалабани қўлга киритди. Мукофотни унга актёр Азиз Раметов топширди.
Хонанда Баҳром Назаров эса «Узр, гўзал» қўшиғи ва клипи учун тақдирланди.
— Қўшиқни ёз ойида мухлисларга тақдим этгандим. Албатта, қўшиқ хит бўлишини истаганмиз, аммо мукофотланиши хаёлимга келмаганди, — дейди хонанда Баҳром Назаров.
Ўзбекистонда хизмат кўрсатган артист Улуғбек Раҳматуллаев эса «Севмаганимда» қўшиғи учун ғолибликни қўлга киритди.
— Бугун жуда кўп ёшлар тақдирланди. Тўғриси, ўзимдан кўра уларнинг ғалабасига қувоняпман, — дейди хонанда.
Хонанда Шоҳруххон эса бу йилги тақдимотда «Эй, ёр» қўшиғи учун тақдирланди. Унга мукофотни сўз устаси Мирзабек Холмедов топширди.
— Албатта, тақдирланганимдан хурсандман. «Мавсум хитлари»га омад тилайман. Лойиҳа бардавом бўлсин ва унда иштирок этиш ҳамиша насиб қилсин, — дейди хонанда Шоҳруххон.
Ўзбекистонда хизмат кўрсатган артист Алишер Файз ҳам «Мавсум хитлари»да тақдирланди.
Хонанда Райҳон эса «Алдандим» таронаси учун тақдирланди. Унга мукофотни клипмейкер Нуриймон Султонхўжаев топширди.
Саҳна ортида Ўзбекистонда хизмат кўрсатган артист Шоҳида Узоқова мириқиб рақс тушди. Самимий актриса ёш ижодкорларни ҳам рақсга чорлади.
Хонанда Озода Нурсаидова ва блогер Озод Хуррамовнинг қўшиғи ғолиб чиқишини кўпчилик кутмаганди. Аммо «Миллион» таронасини ҳам «Мақсум хитлари»да ғалаба қозонди.
— Шукрки, бундай ютуқларни кўп қўлга киритганман. Аммо Озод биринчи бор тақдирланяпти. Шу боис бу мукофотни унга тақдим этаман. Ишонаманки, янада зўр ижод қилади, — дейди хонанда Озода Нурсаидова.
2022 йилнинг энг сермаҳсул ижод қилган хонандаларидан бири шубҳасиз Ҳамдам Собиров бўлди.
Тақдирлаш маросимига кўплаб санъат, спорт ва маданият соҳаси вакиллари ташриф буюришди.
Саҳна ортида ижодкорлар бир-бирларини қутлашди, хусусан, Мирзабек Холмедов ёш ижодкорларни бирма-бир ғалаба билан табриклаб чиқди.
— Тақдирланишни бир неча йилдан буён орзу қиламан. Бу йил қўшиқларим муносиб тақдирланганидан жуда хурсандман, — дейди хонанда Ҳамдам Собиров.
Озод Хуррамов «Миллион» қўшиғи учун дуэтдоши Озода Нурсаидовага ва уларни қўллаб-қувватлаган мухлисларга миннатдорлик билдириб ўтди.
Мавзуга доир:
- Маданият вазирининг Шерали Жўраев билан дуэти ва Мурод Хонтўраев оиласига мукофот. 20 йиллик «запрет»дан сўнг ўтказилган «Замин юлдузлари» тақдирлаш маросимидан репортаж (фото, видео)
- Саҳна ортидаги жанжал, Ситоранинг келинсаломи, «Марио» ва «I операцияси». «Дизайн шоу»нинг янги концерт дастуридан репортаж (видео)
Изоҳ (0)