“Qirmizi olma”, “Layloyimsan”, “Sog‘inib” kabi hit qo‘shiqlari bilan tanilgan xonanda Ulug‘bek Rahmatullayev “Xalqlar do‘stligi” san’at saroyida “Unutilmas noyabr” nomli yetti kunlik konsert dasturini taqdim etmoqda.
Ijodiy faoliyatiga 24 yil to‘lgan ijodkor bu yilgi konsertida ham barcha sevgan mashhur taronalari bilan birga insonni o‘yga toldiruvchi, yuki bor qo‘shiqlar ham kuylaydimi? Qachon to‘liq jonli ijroda konsert beradi? “Daryo” muxbiri xonandaning o‘zidan bu savollarga javob oldi.
Konsertda jami 19 ta qo‘shiq kuylanib, ulardan oltitasi premyera bo‘ldi. Muxlislari bilan diydorni sog‘ingani xonandaning har bir chiqishida sezildi.
“Men sarhisob uchun konsert bermayman, muxlislarimni sog‘inganim uchun ular bilan diydor ko‘rishishni xohlayman, — deydi Ulug‘bek Rahmatullayev. — Chunki so‘nggi yillarda ikki yilda bir marta konsert beryapman: bir yil O‘zbekistonda bersam, kelasi yil chet davlatda. To‘y-hasham o‘z yo‘liga, men o‘zimni sahna odami deb hisoblayman. Muxlislarim bilan dildan suhbatlashaman, ularga nima yoqadi-yu, nima yoqmaydi, bilaman. Uzoq vaqtdan beri tayyorlanishimga sabab mas’uliyatni katta olaman. Konsert kunigacha miyamdan ming xil xayol o‘tadi. Shukr, muxlislarimga konsert yoqib kelyapti, muhimi shu. Boshqa konsertlarimdan bu yilgisining farqi — jiddiy, og‘ir-bosiqlikda o‘tyapti, ulg‘ayyapmiz”.
Xonandaning konsertida yaxshi an’ana bor — insonni o‘ylantiruvchi, tafakkur qilishga undaydigan bir mavzu tanlab, shunga bag‘ishlab qo‘shiq kuylaydi. Avvalgi konsertdagi mavzu — qariyalar uyi, voz kechilgan ota-onalar bo‘lgandi. Xo‘sh, bu yil ijodkor qaysi mavzuni tanladi?
— Bu yil ko‘p mavzularni o‘yladim va qiyomatli do‘st haqida kuylashga qaror qildim. Bundan tashqari, “Ayolingni sev” nomli yangi qo‘shiq bor. Tirik ota-onalar haqida kuylarkanman-u, lekin hammaning ham padari va volidasi hayot emas. Ular uchun ham “Sog‘indim, otam” nomli juda ta’sirli qo‘shiq tayyorlaganman. Oxiri juda g‘amgin qo‘shiqlar ko‘payib ketmadimikin, deb ham o‘ylab qoldim. Lekin muxlislar juda yaxshi qabul qilyapti. Mening konsertimda kulamiz, yig‘laymiz, xulosa chiqaramiz. Boshqa san’atkorlar xafa bo‘lmasin-u, hech kimning muxlislari menikichalik emas!, deydi ijodkor.
Konsert repertuari borasida muxlislarda ikki xil fikr bor: ayrimlar konsertga kelgan muxlislar yangi qo‘shiqlarni birinchi bo‘lib eshitishga haqli desa, boshqalar sevimli xonandasi bilan “oltin hit”larni jo‘r bo‘lib kuylashni xohlaydi. Ulug‘bek Rahmatullayevning bu yilgi konsertida qaysi biri ustunroq?
— O‘zimni ham eng qiynaydigan masala bu — repertuar tanlash. Sababi konsertga keladigan muxlislar 7 dan 70 yoshgacha, yosh yigit-qizlar ham, otaxon-u onaxonlar ham bor. Hammaning ko‘nglini birdek olishga harakat qilaman, baribir. Bu taraflama do‘stlarim, yaqinlarim yordam beradi, dedi xonanda.
So‘nggi yillarda ko‘p estrada xonandalari jonli ijrodagi konsert beryapti. Ayrimlarida to‘liq, ayrimlarida 40—50 foiz jonli ijro bo‘lyapti-yu, lekin eng muhimi bor. Xonandaga jonli ijroda konsert berish fikri keldimi hech degan savolga san’atkor quyidagicha javob berdi:
— Yuz foiz jonli ijroda kuylash orzum, albatta. Lekin bunga to‘sqinlik qiluvchi sog‘liq bilan bog‘liq ba’zi bir holatlar bor. To‘g‘ri, bu ham bir bahona bo‘lishi mumkin, lekin nasib qilsa, kelasi yil ijodimning 25 yilligida to‘liq jonli ijroda konsert berishni niyat qildim.
Konsertda ikkita duet bo‘lib, biri Umidaxon bilan bo‘lsa, ikkinchisi tojikistonlik yosh xonanda bilan. Ikki premyera duet ham muxlislarga manzur keldi. Qiziqchi Avaz Oxun esa o‘z hazillari bilan konsertga kelganlarning kayfiyatini ikki barobarga oshirib yubordi.
Ulug‘bek Rahmatullayev konsertga kelgan muxlislaridan biriga umra safariga yo‘llanma berdi. Nasibaxon ona quvonch ko‘z yoshlarini tiyolmadi va sevimli xonandasini uzoq duo qildi.
Izoh (0)