Концерт бермайди, қошларини термайди, рўмол ва дўпписиз саҳнага чиқмайди. Ўзбек шоу-бизнесидаги анъанасига содиқ машҳурлар

Баъзи инсонларнинг тарк этмас одатлари ёки ўзларига хос анъаналари бор. Ўзбекистонлик машҳурлар ҳам бундан мустасно эмас. Келинг, уларнинг айримлари билан танишамиз.

Ўзбекистон халқ артисти Шерали Жўраев 46 йилдан буён катта саҳнага ва омма олдида миллий бош кийими — дўпписиз кўриниш бермайди.

17 ёшида ижодини бошлаган Рашид Холиқов шу кунгача бирор марта яккахон концерт бермаган. Ижодкор яккахон концерт беришдан кўра, яхши клиплар олишни маъқул кўради.

24 йил аввал ижодини бошлаган Шаҳзода шу кунгача бирор марта соч рангини ўзгартирмаган. У тим қора рангдаги соч аёлни ёш кўрсатади, деб ҳисоблайди.

Қизил рўмоллик хонанда Наргиза Азимова 23 йилдан буён имижига содиқ. Шу йиллар давомида у бирор марта рўмолсиз ва қизил кўйлакциз омма эътиборида кўринмаган. Бунинг сабаби у Сурхондарёдан Тошкентга келаётганида ота-онасига ўзгармаслик ҳақида ваъда берган. Ўшанда унинг эгнида қизил кўйлак ва шу рангдаги рўмол бўлган.

Равшан Комилов ва унинг оила аъзолари 72 рақамига содиқ. Бу анъана тахминан 26 йилдан буён давом этади. Унинг телефони ва машина давлат рақамида  72 сонини учратиш мумкин.

Дурдона Қурбонова отасининг талаби сабаб бирор марта қалин қошларидан воз кечмаган. Ёш актриса ҳар қандай образни табиий қошлар ёрдамида яратиш мумкинлигига ишонади.

Актриса Ситора Фармонова ўзи суратга тушган фильмларга овоз беришни истамайди. Бу унинг тарк этмас одатларидан бирига айланган.

Актриса Моҳира Нурматова шу кунгача ўзи суратга тушмаган ўзбек фильмларининг дубляж жараёнида иштирок этмаган.

«Умуман ўзбек актрисаларига овоз бермайман. Овозимни ҳамма танийди, нега томошабин битта ролда иккита актрисани тасаввур қилиши керак? Ўзбек тилини билмайдиган ёки шевада гапирадиганларга овоз бериш мумкин, қолган актрисалар эса ўз-ўзига овоз бериши керак. ‘Овозим ўзимга тушмайди’, деган баҳонани ким ўйлаб топган, ҳайронман. Ундайлар қандай қилиб ўқишга кирган, нега театрда рол ижро этиб юрибди?! Балки спектаклга келиб ҳам бошқалар овоз бериши керакдир. Хуллас, мен ҳеч қайси ўзбек актрисасига овоз бермайман», — дейди Моҳира Нурматова.

Мавзуга доир:

• Юлдуз Усмонова, Шаҳзода, Улуғбек Раҳматуллаев ва чет эл хонандалари билан дуэт куйлаган бошқа ўзбек санъаткорлари (видео)
• Совиткич, машина ва уй. Ўзбек шоу-бизнеси вакилларининг илк даромадидан қилган қимматбаҳо харидлари (видео)
• 500 квадрат метрли гардероб, иситиш тизимига эга гараж, мини ҳайвонот боғи: Ўзбекистонлик санъаткорлар қандай уйларда яшайди? (фото, видео)