НАТО бош котиби Марк Рютте Ғарб давлатлари Украинага Россия билан “можаронинг траекторияси”ни ўзгартиришга етадиган ҳажмда ёрдам кўрсатиши кераклигини айтди.
Бундай ёндашув Европа, АҚШ, шунингдек, Ҳинд—Тинч океани минтақаси мамлакатлари манфаатларига мос келади, деб ҳисоблайди Шимолий Атлантика альянси раҳбари.
Марк Рютте Франция президенти Эммануэль Макрон билан қўшма матбуот анжуманида Украинани оғир қиш мавсуми кутаётганини таъкидлади.
“Биз биргаликда Украинанинг жанговар қобилиятини сақлаб қолишдан кўра кўпроқ натижага эришишимиз керак. Украиналиклар 2022 йилдан бери энг қаттиқ бўлиши кутилаётган қишга тайёрланар экан, уларни доимий қўллаб-қувватлашда давом этишимиз зарурати ҳақида муҳокама қиламиз. Танлаган йўналишимизда узоқ муддат содиқ қолишимизни тасдиқлашимиз керак”, деди НАТО бош котиби.
Марк Рютте ва Макроннинг илк учрашуви
Жорий йил 12 ноябрь куни Елисей саройида Эммануэль Макрон ва 1 октябрда лавозимига киришган НАТОнинг янги бош котиби ўртасида биринчи учрашув бўлиб ўтди.
ОАВ ёзганидек, асосий мавзу Дональд Трампнинг АҚШ президенти этиб сайланиши фонида Украинага ёрдам кўрсатишни давом эттириш бўлади.
Аввалроқ Россия расмийлари Украинадаги жанговар ҳаракатлар динамикасини Ғарб қуроллари билан ўзгартириб бўлмаслигини таъкидлаганди.
НАТОнинг янги қўмондонлиги
Октябрь ойида НАТО бош котиби Марк Рютте Альянснинг янги қўмондонлиги Украинадаги можаронинг боришига таъсир ўтказа олишини айтганди. Бу ҳақда у Украина ҳарбийларини Хавфсизликка кўмаклашиш ва тайёрлаш бўйича альянснинг янги қўмондонлигига (NSATU) ташриф буюрганида гапириб ўтган.
Мазкур қўмондонликни яратиш тўғрисидаги қарор июль ойида бўлиб ўтган НАТО саммитидан сўнг қабул қилинган. Бунгача қурол-яроғ етказиб беришни мувофиқлаштириш АҚШ молия вазирлиги бошчилигидаги гуруҳ томонидан амалга оширилаётганди.
Изоҳ (0)