НАТОнинг янги бош котиби Марк Рютте 1 октябрдан ўз вазифасини бажаришга киришади. Бу ҳақда альянс хабарида айтилган.
Марк Рютте бу лавозимда беш йил ишлайди. Жорий йилнинг июнь ойида унинг номзоди НАТОга аъзо давлатлар томонидан маъқулланган эди.
Марк Рютте 2010 йилдан бери Нидерландия бош вазири сифатида ишлаб келаётганди. У Киевнинг содиқ иттифоқчиси ва Россия президенти Владимир Путиннинг танқидчиси сифатида шуҳрат қозонган.
Ҳозирда НАТО Бош котиби сифатида Йенс Столтенберг фаолият юритмоқда.
![](/static/2024/09/11/ryutte1-0kuFrwHo.jpeg)
Июль бошида Вашингтонда бўлиб ўтган НАТО саммити альянснинг амалдаги бош котиби Йенс Столтенберг учун охирги саммит бўлганди.
Анжуманда Столтенберг Рютте ҳақида қисқа фикр билдириб, у агар вазифага тайинланса, бу энг тўғри қарор бўлишини айтганди. Альянсда Марк Рюттени танлаш борасида ҳеч қандай қарама-қаршиликлар йўқлигини ҳам маълум қилган.
“Менимча, Марк жуда кучли номзод. У бош вазир сифатида катта тажрибага эга. У яқин дўст ва ҳамкасб, шунинг учун ҳам тез орада альянс унинг менинг ўрнимга номзод бўлиши ҳақида қарор қабул қилишига қаттиқ ишонаман. Бу барчамиз учун, НАТО ва мен учун ҳам яхши бўлади”, деганди НАТО бош котиби.
Изоҳ (0)