Украина Россиянинг Белгород вилоятини НАТО аъзолигига алмаштиришга тайёр, деди Украина президенти Владимир Зеленский Дания бош вазири Метте Фредериксен билан Скридструп авиабазасига ташрифи чоғида ўтказган қўшма матбуот анжуманида.
“Биз Украинанинг НАТОга кириши эвазига Белгородни алмаштиришга тайёрмиз”, — деди Зеленский альянсга аъзо бўлиш учун Украина ўз ҳудудидан воз кечадими, деган саволга жавобан.
Украина раҳбари Даниядан аввал Нидерландияга ташрифи чоғида ҳам Украина ҳудудларини “бирор нимага алмашиш” эҳтимолини рад этганди.
“Бизда битта ҳужжат бор, тинчлик формуласи бор, тилагимиз битта — тинчлик. Уни қандай тасаввур қилсак, (формулани) шундай шакллантирдик, ҳамкасблар билан очиқ муҳокамага тайёрмиз. Қанча кўп бўлса, дунё учун, дунё давлатларининг бир тарафда бўлиши учун шунча яхши. Украинанинг ҳудудий яхлитлиги тўлиқ тикланадиган адолатли тинчлик тарафида”, — деди у Нидерландия бош вазири Марк Рютте билан бўлиб ўтган матбуот анжуманида.
НАТОга кириш учун Украина ҳудудидан воз кечиш ҳақидаги таклиф
Владимир Зеленский 2022 йил сентябрь ойи охирида Украинанинг НАТОга тезлаштирилган тартибда кириши учун ариза топширган. 2023 йил июлида НАТОнинг Вильнюсдаги саммитида альянс аъзолари Украинанинг ҳарбий-сиёсий блокка кириш жараёнини соддалаштиришга келишиб олди, G7 давлатлари эса Украина учун хавфсизлик кафолатлари бўйича баёнот қабул қилди.
Украина Қуролли кучларининг қарши ҳужуми секин кечаётгани фонида, айрим Ғарб таҳлилчилари ва оммавий ахборот воситалари Украина тинчликка эришиш учун НАТОга қўшилиш эвазига Россия томонидан босиб олинган ҳудудларнинг бир қисмидан воз кечиши кераклиги ҳақида гапира бошлади. Хусусан, бундай таклифни НАТО бош котиби идораси раҳбари Стиан Йенссен билдирган.
Зеленский офиси Украина НАТОга аъзо бўлиш учун ҳудудларини алмашмаслигини маълум қилди. Россия Хавфсизлик кенгаши раиси ўринбосари Дмитрий Медведев мазкур таклифни “қизиқ ғоя” деб атади ва Украинанинг “баҳсли ҳудудларига Киев ҳам киришини” айтди.
Кейинчалик Йенссен гаплари хато эканини айтди.
Изоҳ (0)