Руминия президенти Клаус Йоханнис НАТО бош котиби лавозимига ўз номзодини қўйди. 64 ёшли руминиялик сиёсатчи аризани 12 март куни Бухарестда журналистларга маълум қилди. Бу ҳақда Deutsche Welle хабар берди.
Унинг эслатишича, Руминия 2004 йилдан буён Шимолий Атлантика альянси аъзоси ҳисобланади. Йоханниснинг сўзларига кўра, Руминия ҳозирги вазиятда хавфсизлик соҳасида кўпроқ масъулиятни ўз зиммасига олиши керак.
Украина билан чегарадош Руминия жиддий ва узоқ муддатли Россия таҳдидини ҳисобга олган ҳолда янги қарашни шакллантиришга ҳисса қўшиши мумкин, — деди сиёсатчи.
НАТОнинг амалдаги бош котиби Йенс Столтенберг НАТОда 2014 йилдан бери фаолият юритади. Уч маротаба сайланганлиги сабабли, 2023 йил февраль ойида у мандатни яна узайтирмаслигини эълон қилган. Охирги марта унинг НАТО раҳбари сифатидаги мандати ўтган йилнинг июлида Вильнюсдаги саммитда 2024 йил 1 октябргача узайтирилган эди.
Айни пайтда НАТО раҳбарлигига эҳтимолий номзод сифатида Нидерландиянинг истеъфога чиққан бош вазири Марк Рютте кўрилмоқда. Унинг номзоди Германия, АҚШ, Буюк Британия ва Франция томонидан қўллаб-қувватланган, аммо Венгрия томонидан рад этилган. Шарқий Европа давлатлари НАТО раҳбарлигига Клаус Йоханнис ёки Эстония бош вазири Кая Калласни сайлашни афзал деб ҳисоблайди.
НАТОнинг навбатдаги бош котиби июль ойида Вашингтонда ўтадиган НАТО саммити олдидан эълон қилиниши кутилмоқда. Қарор альянснинг барча аъзолари томонидан маъқулланиши лозим.
Изоҳ (0)