НАТОнинг янги бош котиби Марк Рютте 3 октябрь куни Киевга эълон қилинмаган ташрифи чоғида Ғарбнинг Украинани қўллаб-қувватлашини кучайтиришга ваъда берди.
Украина президенти Владимир Зеленский билан бўлиб ўтган қўшма брифинг чоғида Рютте янги лавозимдаги илк хорижий ташрифини Киевга айнан Шимолий Атлантика альянси Украина томонида эканини барчага тушунтириш учун қилганини таъкидлади.
Рюттенинг фикрича, Украинанинг эркинлик учун кураши НАТОнинг асосий тамойиллари ва қадриятларига мос келади.
“Украина энди НАТОга ҳар қачонгидан ҳам яқинроқ ва бизнинг иттифоқимизга аъзо бўлгунга қадар бу йўлдан боришда давом этади”, деди янги бош котиб.
Украинанинг ўзини ҳимоя қилиш ҳуқуқи, Рюттенинг сўзларига кўра, “чегара билан якунланмайди” ва шунинг учун мамлакат Россия ҳудудига узоқ масофали Ғарб ракеталарини отиш имкониятига эга бўлиши керак.
“Россия ноқонуний уруш олиб бормоқда, демак, Россия қирувчи ва ракеталарини Украина фуқаролик инфратузилмасига қарши ишлатишдан олдин нишонга олиш ҳаётни сақлаб қолишга ёрдам беради”, дея таъкидлаган у.
Рютте, шунингдек, ноябрь ойида АҚШда бўлиб ўтадиган президентлик сайловларида ким ғалаба қозонишидан қатъи назар, мамлакат билан ҳамкорлик қила олишига ишонтирган.
Зеленский Рютте билан музокаралар чоғида Украинанинг “ғалаба режаси”, фронтлардаги вазият ва Украина армиясининг ўзига хос эҳтиёжлари муҳокама қилинганини маълум қилган. У яна бир бор Украинага Ғарбнинг кўпроқ қуроллари, жумладан узоқ масофага учувчи қуроллари кераклигини айтган.
“Ғарб ёрдамисиз Украинага урушда ғалаба қозониш имконияти йўқ, бизга етарли миқдорда ва сифатли қуроллар, жумладан, узоқ масофага мўлжалланган қуроллар керак”, деди Зеленский.
Рютте Шимолий Атлантика альянсининг устувор вазифаси Украинага ёрдам беришдан ташқари, НАТО давлатларининг шахсий қурол-яроғ захираларини тўлдириш эканлигини қўшимча қилган.
Изоҳ (0)