Қорақалпоғистонда ҳуқуқ-тартибот идоралари томонидан фуқароларга криптовалюта сотиб олишни таклиф қилаётган шахс қўлга олинди. Бу ҳақда ИИВ Киберхавфсизлик маркази хабар берди.
Қайд этилишича, Наманган вилояти Давлатобод туманида яшовчи 29 ёшли Э.Х. ИИОга мурожаат қилиб, номаълум шахс унинг банк картасидаги 8 миллион 190 минг сўм пулини ўзлаштирганини билдирган.
Киберхавфсизлик бўлинмалари ходимлари тезкор-қидирув тадбирлари давомида ушбу шахс аниқланган. У Қорақалпоғистоннинг Амударё туманида яшовчи 27 ёшли Й.Д. бўлиб чиққан.
Гумонланувчи ва жабрланувчи Instagram’да танишган. Й.Д. криптовалюта савдоси билан шуғулланиб, Э.Х.дан фирибгарлик йўли билан пул олгани, бироқ келишилган криптовалюталарни ўтказиб бермагани маълум бўлган.
Й.Д.га нисбатан Жиноят кодексининг 169-моддаси 3-қисми “б” банди (ахборот тизимига ноқонуний кириш ёки ундан фойдаланиш орқали ўғрилик, 5 йилдан 8 йилгача озодликдан маҳрум қилиш) билан жиноят иши қўзғатилган. Ҳозирда унинг шу каби бошқа жиноятларга алоқадорлигини аниқлаш мақсадида тергов ҳаракатлари олиб борилмоқда.
Бундан олдин Сурхондарё вилоятининг Олтинсой ва Термиз туманларида 11 миллиард сўмдан ортиқ кредит маблағларини ўзлаштирган МЧЖ раҳбарлари аниқланганди. Шунингдек, Сурхондарё ва Фарғонада оилавий корхоналар раҳбарлари 1,2 миллиард сўмдан ортиқ имтиёзли кредитларни талон-торож қилгани тўғрисида хабар берилган эди.
Изоҳ (0)