АҚШнинг сайланган президенти Дональд Трамп ҳудудий имтиёзларсиз Украинага урушни музлатиш ва камида 20 йилга НАТОга аъзо бўлишдан воз кечишни таклиф қилиши мумкин. Бу ҳақда манбаларга таяниб, The Wall Street Journal хабар берди.
Манбаларга кўра, ҳозирги вақтда Трампнинг маслаҳатчилари урушнинг шундай сценарийсини муҳокама қилмоқда. Ҳарбий ҳаракатлар музлатилгандан сўнг, бутун фронт чизиғи бўйлаб 1300 километр узунликдаги демилитаризация зонаси эълон қилиниши мумкин. Бироқ унинг хавфсизлигини ким таъминлаши ҳозирча номаълум. Суҳбатдошлардан бири бунга Америка қўшинлари ёки БМТ контингенти жалб қилинишини истисно этмоқда.
Ўз навбатида, яқин 20 йил ичида НАТОга аъзо бўлмаслик эвазига Трамп Украинани қурол билан таъминлаши мумкин.
Биз ҳарбийларни ўқитишимиз ва бошқа ёрдамлар кўрсатишимиз мумкин, лекин бу билан биринчи навбатда Европа давлатлари шуғулланади. Биз америкалик эркак ва аёлларни Украинада тинчликни сақлаш учун юбормаймиз. Бунинг учун пул тўламаймиз. Поляклар, немислар, инглизлар ва французлардан шу билан шуғулланишни сўранглар, деди Трамп жамоасининг аъзоларидан бири.
Трамп ҳозирча Украинадаги урушни тўхтатиш бўйича аниқ режани маъқулламаган. Республикачининг миллий хавфсизлик бўйича собиқ ёрдамчиси Трампнинг шахсан ўзи ва энг охирги дақиқада қарор қабул қилиши, ҳеч ким буни олдиндан айта олмаслигини таъкидлади.
Изоҳ (0)