Венгрия бош вазири Виктор Орбан, агар АҚШ собиқ президенти Дональд Трамп ноябрь ойида ҳокимиятга қайтса, Киевни молиялаштиришни тўхтатиб, Украинадаги урушни тугатиши мумкинлигини айтди. Бу ҳақда CNN нашри хабар берди.
“Трамп бу борада аниқ режага эга. У қайта сайланса, аввалига Украинани бир тийинсиз қолдиради. Табиийки, бундай шароитда уруш тугайди, чунки Украина Ғарб пулисиз ўзини тик тутиб туролмайди”, — деган Виктор Орбан журналистларга берган интервьюсида.
Хабарга кўра, Виктор Орбан ҳукумати Россиянинг Украинага кенг миқёсли босқини бошланганидан бери доимий равишда Европа Иттифоқи ва НАТОнинг Украинага ёрдам бериш ҳаракатларига жиддий қарши бўлиб келган. Украина учун ёрдам пакетлари ажратилишини тасдиқлаш масаласини атайин чўзиб келган.
Венгрия раҳбарининг бундай баёнотлари АҚШда хавотир уйғотган. Венгрия ортидан бутун Европада Украинага ёрдамни тўхтатиш учун ҳаракат бошланиши эҳтимоли юзага келган. Польшада юзага келган фермерлар исёни ҳукуматларни Украина масаласида эҳтиёткор бўлишга чақираётгани таъкидланган.
“Агар америкаликлар бу урушни молиялаштиришдан тўхтаса, уруш тугайди. Европаликлар ўзи бу урушни молиялаштира олмайди”, — дея қўшимча қилган Виктор Орбан.
Изоҳ (0)