AQSHning saylangan prezidenti Donald Tramp hududiy imtiyozlarsiz Ukrainaga urushni muzlatish va kamida 20 yilga NATOga a’zo bo‘lishdan voz kechishni taklif qilishi mumkin. Bu haqda manbalarga tayanib, The Wall Street Journal xabar berdi.
Manbalarga ko‘ra, hozirgi vaqtda Trampning maslahatchilari urushning shunday ssenariysini muhokama qilmoqda. Harbiy harakatlar muzlatilgandan so‘ng, butun front chizig‘i bo‘ylab 1300 kilometr uzunlikdagi demilitarizatsiya zonasi e’lon qilinishi mumkin. Biroq uning xavfsizligini kim ta’minlashi hozircha noma’lum. Suhbatdoshlardan biri bunga Amerika qo‘shinlari yoki BMT kontingenti jalb qilinishini istisno etmoqda.
O‘z navbatida, yaqin 20 yil ichida NATOga a’zo bo‘lmaslik evaziga Tramp Ukrainani qurol bilan ta’minlashi mumkin.
Biz harbiylarni o‘qitishimiz va boshqa yordamlar ko‘rsatishimiz mumkin, lekin bu bilan birinchi navbatda Yevropa davlatlari shug‘ullanadi. Biz amerikalik erkak va ayollarni Ukrainada tinchlikni saqlash uchun yubormaymiz. Buning uchun pul to‘lamaymiz. Polyaklar, nemislar, inglizlar va fransuzlardan shu bilan shug‘ullanishni so‘ranglar, dedi Tramp jamoasining a’zolaridan biri.
Tramp hozircha Ukrainadagi urushni to‘xtatish bo‘yicha aniq rejani ma’qullamagan. Respublikachining milliy xavfsizlik bo‘yicha sobiq yordamchisi Trampning shaxsan o‘zi va eng oxirgi daqiqada qaror qabul qilishi, hech kim buni oldindan ayta olmasligini ta’kidladi.
Izoh (0)