Польшалик мутахассислар ДНК, 3D принтер ва лой ёрдамида тахминан 400 йил аввал яшаган қиз кўринишини қайта тиклади. Маҳаллий аҳоли орасида Зосиа деб номланган ушбу қиз қолдиқлари 2022 йилда Польшанинг Николай Коперник университети археологлари томонидан аниқланган. Бу ҳақда Sky News хабар берди.
Қолдиқлар бўйин қисмида ўроқ билан маҳкамланган, оёғига эса осма қулф осилган ҳолда аниқланган. Ўша даврда ўроқ ва қулф, шунингдек, қабр ёнидан топилган айрим ёғоч турлари вампирлардан ҳимоя қилувчи сеҳрли хусусиятларга эга деб қаралган.
Зосианинг жасадлари таҳлили шуни кўрсатадики, у вафот этган пайтда 18-20 ёшда бўлган. Қиз ҳушдан кетиш, кучли бош оғриғи ва руҳий саломатлик билан боғлиқ муаммоларга олиб келиши мумкин бўлган касалликдан азият чеккан.
Мутахассислар реконструкцияни 3D принтерда бош суягининг нусхасини яратишдан бошлаган, кейин эса реалистик юзни шакллантириш учун пластилин қатламларини аста-секин кенгайтирган. Юз чуқурлигини баҳолашда суяклар тузилиши жинс, ёш, этник келиб чиқиш ва тахминий вазн маълумотлари билан бирга ҳисобга олинган.
Зосианинг ҳаёти ҳақида оз нарса маълум, аммо мутахассислар, у бой, эҳтимол, аслзода оиладан бўлиши мумкинлигини таъкидлайди.
Изоҳ (0)