Украинага Евроиттифоққа аъзолик номзоди «тақдим этилди» дейиш нотўғри, бу муваффақиятни қадрсизлантиради, деди Украина президенти Владимир Зеленский ўз мурожаатида. Видео унинг Telegram-каналида эълон қилинди.
«Тасаввур қилинг, биз Эверестни забт этяпмиз. Охиридан олдинги нуқтага етдик, атрофга қарамадик, ҳатто нафасимизни ростламадик ва чўққигача қолган йўл ҳақида, сўнгги 1848 метрни қандай босиб ўтиш ҳақида гапиряпмиз. Бир лаҳзада биз ўз муваффақиятимиз ҳақида унутдик ва уни қадрсизлантирдик. Балки олдин 7 минг метрни енгиб ўтганимизни эсга олармиз?» — дея таклиф киритди Зеленский.
Украина президенти қўшимча қилишича, эрта тонгдан интернет, радио ва телевидениеда Украина Евроиттифоққа қўшилиш учун бажариши керак бўлган шартлар муҳокама қилинмоқда, улар қийин бўлиши ва бир неча йил вақт олиши айтилмоқда. «Келинг, бироз бўлса-да хурсанд бўлайлик, ич-ичимиздан, жимгина, лекин ўзимиз, ўз давлатимиз учун хурсанд бўлайлик. Келинг, бу лаҳзани ҳис қилиб, мазасини тотайлик», — дея даъват қилди у. Зеленский таъкидлашича, номзодлик мақоми Украинага «осмондан тушгани йўқ».
23 июнь куни Европарламентнинг аксарият депутатлари Украина ва Молдовага тезликда Евроиттифоқ аъзолигига номзод мақоми тақдим этилиши ҳақидаги резолюцияни кўпчилик овоз билан қабул қилди, 529 парламентарий ёқлаб овоз берди, 45 киши қарши чиқди, яна 14 киши бетараф қолди. Еврокенгаш раҳбари Шарль Мишель қарор ҳақида эълон қилиб, уни «тарихий» деб атади.
Сўнг Зеленский Украина бу қарорни мустақилликка эришганидан буён қарийб 30 йил кутганини айтди. Унинг таъкидлашича, бунинг шарофати билан Евроиттифоқ ўзининг кучайтирилишига қараб «энг катта қадамни ташлади».
Россия расмий шахслари эса Евроиттифоқнинг қарори юзасидан турлича фикрлар билдирди. Ташқи ишлар вазири Сергей Лавров май ойида Украинанинг номзод мақомини олиши истиқболи туфайли «жиддий шубҳалари» ҳақида гапирган ва ташкилот «аслида ўзи юзага келган конструктив иқтисодий платформадан тажовузкор жанговар ўйинчига айлангани»ни айтган эди. Июнь охирида эса вазир Евроиттифоқ ҳарбий блок эмаслигини, шу сабабли Россия учун хавф ва таҳдидлар йўқлигини маълум қилди. Президент вакили Дмитрий Песков ҳам Евроиттифоқнинг Украина бўйича қарори «Европанинг ички иши» эканини айтди.
«Евроиттифоқ, моҳиятан, МДҲ маконини фаол геосиёсий ўзлаштириш ва ундан Россияни ‘тийиб туриш’ мақсадида фойдаланиш йўлини давом эттираётганини тасдиқлади», — деди Ташқи ишлар вазирлиги вакили Мария Захарова.
Изоҳ (0)