Россия ташқи ишлар вазири Сергей Лавров Европа Иттифоқи ва НАТО давлатлари Россия билан урушга тайёрланмоқда, деб ҳисоблайди. Бу ҳақда у Бокудаги матбуот анжуманида маълум қилган.
Лавровнинг фикрича, «Европа Иттифоқининг русофобияси» узоқ келажакда ҳам йўқолмайди. Унинг сўзларига кўра, европаликлар Иккинчи жаҳон уруши бошланишини эслатувчи йўлни танлаган, ўшанда «Гитлер Совет Иттифоқига қарши курашиш учун Европа давлатларининг муҳим қисмини, балки кўп қисмини ўз байроғи остида тўплаган эди».
«Ҳозир ҳам, шу жумладан Европа Иттифоқи, НАТО билан биргаликда Россия Федерацияси билан курашиш ва умуман олганда, уруш қилиш учун шундай замонавий коалицияни йиғмоқда. Буларнинг барчасини диққат билан кўриб турибмиз», — деди Лавров.
Вазирнинг қўшимча қилишича, Россия расмийлари «Европа Иттифоқининг хатти-ҳаракатларини кузатмоқда» ҳамда уларнинг Украина ва Молдовага иттифоқ аъзолигига номзод мақомини берганидан сўнг ташлайдиган қадамларига яраша чора кўради.
23 июнь куни ЕИ давлатлари раҳбарлари саммит чоғида Украина ва Молдовага ЕИга номзод мақомини беришга келишиб олди. Украина президенти Владимир Зеленский аъзоликка номзод учун тегишли аризани Россиянинг Украинага босқини бошланганидан бир неча кун ўтиб берган эди. Июнь ойида Россия президенти Владимир Путин Россия Украинанинг ЕИга киришига қарши эмаслигини айтган.
Изоҳ (0)