Қайиғи тўнтарилган ҳолда финиш чизиғини кесиб ўтган спортчининг натижаси бекор қилинди

Кеча, 25 август куни мусобақанинг сўнгги куни доирасида россиялик каноэчи Захар Петров 500 метр масофага финал босқичида иштирок этди.

Петровнинг чиқишида антиқа ҳодиса юз берди. Спортчи финишга оз қолганида қайиғи ағдарилиб кетди, шунга қарамасдан, қайиқ финишни кесиб ўтди. Аммо расмий протоколда Захарнинг натижаси дастлаб, ҳисобга олинмади.

Шундан сўнг Петров томони ташкилотчиларга протест билдирди. Қайта текширилгач, Захарнинг олтин медал қўлга киритгани эълон қилинди.

Аммо бир оздан сўнг Захардан олтин медал олиб қўйилгани ва у расмий протоколда финишга қадар етиб кела олмагани қайд этилди. Олтин медал эса иккинчи бўлган молдовалик Сергей Тарновскийга насиб этди.

Маълум бўлишича, Россия эшкак эшиш федерацияси ушбу қарордан сўнг, яна бир бор ташкилотчилар томон протест киритган.

Россиялик спортчилар ушбу мусобақада нейтрал мақомда қатнашмоқда.

Ушбу мусобақада Ўзбекистон терма жамоаси аъзоларига медаллар насиб этмади.