Испаниянинг жануби-шарқида 29 октябрь куни кучли ёмғирдан сўнг кенг кўламли сув тошқинлари бошланди. Бу ҳақда BBC хабар берди.
Совуқ ҳаво оқими “Дана” тўфонини ва кучли ёмғирларни олиб келди, бу эса кучли сув тошқинларига сабаб бўлди. Оқибатда дарёлар қирғоқларидан тошиб кетди, бир қанча ҳудудларга жиддий зарар етди. Бутун аҳоли пунктларини сув босмоқда, аҳолига уйдан чиқмаслик ва зарур бўлмаган сафарлардан тийилиш тавсия этилган. Табиий офатдан кўпроқ Валенсия ва Альбасете шаҳарлари зарар кўрган.
Малага шаҳрида 300 га яқин йўловчиси бўлган тезюрар поезди рельсдан чиққан. Қурбонлар қайд этилмаган. Кўчалардан катта тезликда оқаётган сув оқимлари автомобилларни ювиб кетмоқда. Полиция ва қутқарувчилар томлар ва автомобиллардаги одамларни қутқариш учун вертолётлардан фойдаланмоқда.
Валенсия шаҳар ҳокимлиги 30 октябрь куни мактаблардаги дарслар ва спорт тадбирлари бекор қилиниши, боғлар ёпиқ қолишини билдирган. Вайрон бўлган ҳудудларга мингдан ортиқ аскар жўнатилган. Сув тошқини сабабли поезд қатновлари ва авиарейслар бекор қилинган.
Испаниянинг АEMEТ давлат метеорология агентлиги Валенсия ва бошқа ҳудудларда хавфнинг қизил даражасини эълон қилди. Бу жойларда аллақачон 200 миллиметр ёғин ёғган бўлиб, бу бир ойлик меъёрдан ортиқдир. Олимлар тахминича, иқлим ўзгариши туфайли экстремал об-ҳаво ҳодисалари тобора кучайиб бормоқда.
Изоҳ (0)