Ispaniyaning janubi-sharqida 29-oktyabr kuni kuchli yomg‘irdan so‘ng keng ko‘lamli suv toshqinlari boshlandi. Bu haqda BBC xabar berdi.
Sovuq havo oqimi “Dana” to‘fonini va kuchli yomg‘irlarni olib keldi, bu esa kuchli suv toshqinlariga sabab bo‘ldi. Oqibatda daryolar qirg‘oqlaridan toshib ketdi, bir qancha hududlarga jiddiy zarar yetdi. Butun aholi punktlarini suv bosmoqda, aholiga uydan chiqmaslik va zarur bo‘lmagan safarlardan tiyilish tavsiya etilgan. Tabiiy ofatdan ko‘proq Valensiya va Albasete shaharlari zarar ko‘rgan.
Malaga shahrida 300 ga yaqin yo‘lovchisi bo‘lgan tezyurar poyezdi relsdan chiqqan. Qurbonlar qayd etilmagan. Ko‘chalardan katta tezlikda oqayotgan suv oqimlari avtomobillarni yuvib ketmoqda. Politsiya va qutqaruvchilar tomlar va avtomobillardagi odamlarni qutqarish uchun vertolyotlardan foydalanmoqda.
Valensiya shahar hokimligi 30-oktyabr kuni maktablardagi darslar va sport tadbirlari bekor qilinishi, bog‘lar yopiq qolishini bildirgan. Vayron bo‘lgan hududlarga mingdan ortiq askar jo‘natilgan. Suv toshqini sababli poyezd qatnovlari va aviareyslar bekor qilingan.
Ispaniyaning AEMET davlat meteorologiya agentligi Valensiya va boshqa hududlarda xavfning qizil darajasini e’lon qildi. Bu joylarda allaqachon 200 millimetr yog‘in yog‘gan bo‘lib, bu bir oylik me’yordan ortiqdir. Olimlar taxminicha, iqlim o‘zgarishi tufayli ekstremаl ob-havo hodisalari tobora kuchayib bormoqda.
Izoh (0)