Германия канцлери Олаф Шольцнинг айтишича, Ғарб Россияга қарши киритаётган санкцияларининг акс таъсирини ҳам ҳисобга олиши керак.
Шольцнинг огоҳлантиришича, Россияга қарши чораларнинг акс таъсири «енгса бўладиган» бўлиши зарур. Канцлер шу сабабли Германия ўз позициясига содиқ қолаётгани ва Россия газининг Европага импортини тақиқлашга қарши эканини яна бир бор таъкидлади. Унинг тушунтиришича, гап қисқа муддатли масалалар ҳақида эмас, балки Ғарб давлатлари тоқат қилишга мажбур бўладиган узоқ муддатли қарама-қаршиликлар ҳақида кетмоқда.
Бундан ташқари, бу Германиядан кўра кўпроқ нефть, газ, кўмир импортига қарам бўлган бошқа давлатлар учун ҳам амал қилади. Ва бу масалада ҳеч ким тақдир ҳукмига ташлаб қўйилмаслиги керак, — деди Германия канцлери.Шольц Европа ва унинг ҳамкорлари Россия каби йирик давлатга нисбатан энг оғир санкцияларни жорий қилиб бўлганини айтди. Унинг қўшимча қилишича, чекловчи чоралар Россиянинг иқтисодий ривожланишига таъсир қилади, оқибати эса «бундан ҳам кескинроқ» бўлади.
Шу билан бирга, Германия канцлери Европа Иттифоқининг барча мамлакатлари Россия энергиясининг импортига қарамликни камайтириш сингари узоқ муддатли мақсадларга эгалигини таъкидлади.
Аввал ҳам Шольц Россияга нисбатан тақиқлар Европадаги энергетика хавфсизлиги учун чинакам таҳдид бўлишини билдирганди.
Бу орада Германия бош вазирининг ўринбосари Роберт Хабек Қатар билан суюлтирилган табиий газ (СTG) етказиб беришни назарда тутувчи энергетика соҳасида ҳамкорлик қилишга келишиб олди. Хабек аввалроқ Германия кузгача Россия кўмиридан, 2022 йил охирига келиб эса Россия нефтидан деярли тўлиқ мустақил бўлиш ниятида эканини маълум қилганди. Шу билан бирга, у Россия газига қарамликдан халос бўлиш қийинроқ бўлишини тан олган, чунки Германия СТГ импорти учун ўз имкониятларига эга эмас.
Изоҳ (0)