Германия бош вазирининг ўринбосари ва иқтисодиёт вазири Роберт Хабек Қатар билан суюлтирилган табиий газ (STG) етказиб беришни назарда тутувчи энергетика соҳасида ҳамкорлик қилишга келишиб олди. Бу ҳақда Die Welt хабар бермоқда. Хабек Қатар амири билан Доҳадаги музокаралар чоғида узоқ муддатли энергетика ҳамкорлиги бўйича келишувга эришган.
Вазирнинг таъкидлашича, энди компаниялар ўртасида STG етказиб бериш бўйича муайян шартномаларни тузиши қолди. Йиғилишда RWЕ, E.ОN ва Uniper каби концернлар вакиллари иштирок этган, дея таъкидлайди нашр.
Иқтисодиёт вазирлиги раҳбари аввалроқ Германия кузгача Россия кўмиридан, 2022 йил охирига келиб эса Россия нефтидан деярли тўлиқ мустақил бўлиш ниятида эканини маълум қилганди. Шу билан бирга, Хабек Россия газига қарамликдан халос бўлиш қийинроқ бўлишини тан олган, чунки Германия STG импорти учун ўз имкониятларига эга эмас.
Вазирнинг таъкидлашича, ҳозир Германиянинг асосий мақсади мамлакатда STG терминалларини қуриш бўлиб, Берлин Норвегия, АҚШ, Канада ва Қатар билан газ етказиб бериш бўйича музокаралар олиб бормоқда.
Бунгача Еврокомиссия президенти Урсула фон дер Ляйен Россия энергиясидан тезроқ воз кечиш режаси тайёрланаётганини маълум қилганди. «Май ойи охиригача биз 2027 йилгача Россия гази, нефти ва кўмирига қарамликдан босқичма-босқич воз кечиш бўйича таклиф киритамиз. Бу зарур миллий ва Европа ресурслари томонидан қўллаб-қувватланади», — деган у. Бироқ Европанинг айрим етакчилари, жумладан, Германия канцлери Олаф Шольц Россиядан энергия етказиб беришни тақиқлашга қарши чиққан.
Изоҳ (0)