Stanislavskiyning sahna san’ati nazariyasi odatda aktyorlar, ya’ni kadr tashqarisida emas, ichida bo‘lganlar bilan bog‘lanadi. Gollivudda ham ko‘plab rejissyorlar borki, ular aktyorlar ijrosida samimiylik va hissiy ishtirokini oshirish uchun Stanislavskiy sistemasidan foydalanishadi. Ayrim rejissyorlar mukammallikka erishish uchun har qanday chegarani kesib o‘tishga tayyor bo‘ladi, natijada aktyorlar haqiqiy azoblarni boshdan kechiradi. Bunday rejissyorlardan biri Stenli Kubrik va Alfred Hitchkok edi. Zamonaviy kinoda bunday ekstremal usullar kam uchrasa-da, ba’zi istisnolar ham bo‘lib turadi — bugun ana shu haqida gaplashamiz.
“Billni o‘ldirish”, 2003
- jangari, drama, triller / AQSH
- Rejissyor: Kventin Tarantino
- Rollarda: Uma Turman, Lyusi Lyu, Vivika A. Foks, Juli Dreyfus
Kventin Tarantino va uning ilhom parisi Uma Turman o‘rtasidagi do‘stlik barchaga abadiydek tuyulgan edi, ammo 2010-yillarning o‘rtalarida aktrisa “Billni o‘ldirish” filmini suratga olish maydonchasida yuz bergan noxush hodisa haqida ochiq gapirib chiqadi. Ma’lum bo‘lishicha, kabrioletda olingan mashhur sahna davomida Turman jiddiy avtohalokatga uchragan — u soatiga 65 km tezlikda harakatlanayotib, boshqaruvni yo‘qotgan va daraxtga urilgan. Mashina butunlay yaroqsiz holga kelgan, Turmanning o‘zi esa og‘ir tan jarohatlari, miya chayqalishi, bo‘yin va oyoq sinishi bilan shifoxonaga yotqizilgan. E’tiborli tomoni shundaki, avvaliga u ushbu sahnada suratga tushishni xohlamagan va kaskadyordan foydalanishni talab qilgan. Biroq Tarantino va film prodyuseri Harvi Vaynshteyn Turmanning o‘zi kadrda bo‘lishini talab qilgan.
“Omon qolgan”, 2015
- jangari, vestern, drama / AQSH
- Rejissyor: Alexandro Gonsales Inyarritu
- Rollarda: Leonardo Di Kaprio, Tom Hardi, Donal Glison
Leonardo Di Kaprioning ilk “Oskar” mukofoti unga juda qimmatga tushgan. Alexandro Inyarritu rejissyorligidagi “Omon qolgan” filmining uzoq davom etgan suratga olish ishlari Kanada o‘rmonlarida bo‘lib, aktyorlar haqiqiy sinovlardan o‘tadi. Rejissyor filmi iloji boricha real chiqishi maqsadida Di Kaprioni muzdek suvga tushishga, xom bizon go‘shtini yeyishga va ot jasadi ichida uxlashga majbur qiladi. The Hollywood Reporter ma’lumotiga ko‘ra, bu jarayon haqiqiy “do‘zax”ga aylangan, xavfsizlik choralariga e’tibor berilmagan, ob-havo sharoiti esa ishlarga to‘sqinlik qilgan.
“Titanik”, 1997
- drama, melodrama / AQSH
- Rejissyor: Jeyms Kemeron
- Rollarda: Leonardo Di Kaprio, Keyt Uinslet, Billi Zeyn
“Avatar” va “Titanik” filmlari rejissyori Jeyms Kemeron o‘z ishiga sadoqati va qattiqqo‘lligi bilan mashhur. Unga nafaqat suratga olish guruhi, balki prodyuserlar ham moslashishga majbur bo‘lgan. So‘nggi yillarda Kemeron ancha yumshagan bo‘lsa-da, 90-yillarda xarakterini to‘liq namoyon qilgan, bu esa “Titanik” filmini suratga olishda ko‘plab mojarolarga sabab bo‘lgan. Eng katta muammo aktrisa Keyt Uinslet bilan sodir bo‘lgan. Kemeronning o‘zi ham Uinsletning sog‘lig‘iga befarq bo‘lganini tan olgan, aktrisani sovuq suvda uzoq vaqt qolishga majburlagan.
“Chaynataun”, 1974
- detektiv, drama, triller / AQSH
- Rejissyor: Roman Polanski
- Rollarda: Jek Nikolson, Fey Danauey, Jon Hyuston
Roman Polanski eng janjalkash rejissyorlardan biri sifatida tanilgan bo‘lib, uning nomi bir qator dahshatli voqealar bilan bog‘liq. Bularga homilador Sheron Teyt va uning do‘stlarining o‘ldirilishi, shuningdek, 1970-yillarda Jek Nikolsonning uyida voyaga yetmagan qizni zo‘rlash kiradi. Polanskining aktyorlar bilan ishlashdagi ijodiy usullari uning axloqiy qadriyatlarini shubha ostiga qo‘yadi. “Chaynataun” filmini suratga olishda bosh rol ijrochisi Fey Danauey doimiy tazyiqlarga duch kelgan. Uning qahramoni Evelin Kross-Mulray og‘ir ruhiy holatda bo‘lgani uchun Polanski bu hissiyotlarni kuchaytirish maqsadida Danaueyni dubllar oralig‘ida qo‘rqitgan. Aktrisa “Oskar” nominatsiyasiga sazovor bo‘lishiga qaramay, Polanski bilan ishlash tajribasidan yomon taassurotlar bilan qolgan. O‘z memuarlarida u “Polanski zaif ayollarni yoqtirardi, ular unga tahdid solmasdi”, deb eslaydi. Danauey esa hech qachon bunday ayol bo‘lmagan.
Izoh (0)