Аляскада круиз лайнери улкан муз бўлаги билан тўқнашиб кетди (видео)

Carnival Spirit круиз лайнери Аляскадаги Трейси-Арм кўрфазида сузиб кетаётиб муз бўлаги билан тўқнашиб кетди. Бу ҳақда CNN хабар берди.

Йўловчилардан бири ҳазиллашиб, воқеани “Титаник”нинг ҳалокатга учрашига ўхшатган. Ҳодиса оқибатида ҳеч ким жабрланмаган, бироқ кўплаб йўловчилар қўрқувни бошдан ўтказган.

Carnival Cruise Line компанияси вакили ҳодиса ҳаракатланувчи муз билан тўқнашув туфайли содир бўлганини тасдиқлаган. Мутахассислар лайнер ҳолатини баҳолагунча у бир неча соат бир жойда турган. Ҳеч қандай зарар қайд этилмаган ва круиз ҳаракатланишда давом этган. 

Круиз лайнерининг улкан муз билан тўқнашуви йўловчиларни беихтиёр “Титаник”нинг фожиали тарихини эслашга мажбур қилган. Дарвоқе, бу ҳолатда гап айсберг ҳақида бораётгани йўқ, шунинг учун таққослаш унчалик тўғри эмас.

Лайнер круизни Сиэтлда якунлаган. Кўп ўтмай, Carnival Spirit худди шу йўналиш бўйлаб янги икки ҳафталик саёҳатга йўл олган. Компания воқеа кеманинг ишига ва унинг кейинги рейсларига ҳеч қандай таъсир кўрсатмаганини таъкидлаган.

Аляска сувлари круиз кемалари учун энг мураккаб навигация ҳудудларидан бири ҳисобланади. Шунга қарамай, у сайёҳлар орасида жуда оммалашган. Мутахассислар таъкидлашича, замонавий круиз лайнерлари турли хил шароитларда ҳаракатланишга мослаштирилган. Бундан ташқари, саёҳатлар учун Аляска хусусиятларини яхши биладиган энг тажрибали капитанлар танланади. Мутахассислар бундай ҳодисаларнинг аксарияти кемалар учун хавф туғдирмаслигини айтмоқда.