Европа Иттифоқи россиялик мухолифатчи Алексей Навальнийнинг ўлими муносабати билан Россия адлия тизимининг бир қатор вакилларига нисбатан санкциялар қўллаш бўйича келишиб олди. Бу ҳақда тегишли манбаларга таяниб, Deutsche Welle хабар берди.
Бундай қарор 18 март куни ЕИ давлатлари ташқи ишлар вазирлари томонидан қабул қилинган.
ЕИ санкцияларни принципиал жиҳатдан маъқуллаган бўлса-да, қонуний кучга эга бўлган қарор ҳали қабул қилинмаган. ТИВ йиғилишидан кейин ўтказилган матбуот анжуманида ЕИнинг ташқи сиёсат бўйича раҳбари Жосеп Боррелл санкциялар мухолифатчининг ўлдирилишида жавобгар бўлган 30 нафар шахс ва ташкилотга қаратилганини айтган.
Февраль ойи охирида Буюк Британия Навальний ўлимига жавобан жазо чораларини жорий этган биринчи давлат бўлди. Санкцияларга Ямало-Ненец автоном округидаги 3-сон ахлоқ тузатиш колонияси раҳбари Вадим Калинин ва беш нафар депутат киритилган. Чоралар Буюк Британияга киришни тақиқлашни ва активларни музлатишни ўз ичига олган. Ўша ойда Қўшма Штатлар ҳам Навальнийнинг ўлимига жавобан шахсий санкциялар киритган.
Навальнийнинг ўлими
Навальний Ямало-Ненецк автоном округидаги 3-сонли ахлоқ тузатиш колониясида 16 февраль куни вафот этган эди. Ўлим ҳисоботида сиёсатчи табиий сабабларга кўра вафот этгани айтилган. Мухолифатчи тарафдорлари унинг ўлдирилганига ишонади. Навальний 2021 йил бошидан бери қамоқда бўлган. 2023 йил августида Москва шаҳар суди сиёсатчини “экстремизм” иши бўйича махсус режимли колонияда 19 йиллик қамоқ жазосига ҳукм қилган эди.
Навальний вафотидан сўнг, 40 дан ортиқ давлатлар фожиа ҳолатларини мустақил текширишга чақирган. Европа Иттифоқининг Женевадаги халқаро ташкилотлар бўйича вакили Лотте Кнудсен Россия унинг тўсатдан содир бўлган ўлими юзасидан мустақил ва шаффоф халқаро тергов ўтказиш имкониятини таъминлаши кераклигини таъкидлаган.
17 март куни Россия президенти Владимир Путин Навальнийни Ғарб давлатларида қамоқда ўтирган айрим маҳбусларга алмаштирмоқчи бўлганини тан олган. The Wall Street Journal нашрининг ёзишича, сиёсатчи Чеченистоннинг собиқ дала қўмондони Зелимхон Ханқошвилини ўлдирганликда айбланиб, Германияда умрбод қамоқ жазосини ўтаётган Вадим Красиковнинг Россияга қайтиши билан боғлиқ айирбошлаш учун шахслар рўйхатига киритилиши мумкин бўлган.
Изоҳ (0)