Россиялик депутат ток-шоуда Қозоғистон ҳудудини «Россиянинг совғаси» деб атади. Қозоғистон ТИВга Россия дипломати чақирилди

Россия давлат думасининг таълим ва фан қўмитаси раиси Вячеслав Никоновнинг Қозоғистон ҳудудининг катта қисми аслида қозоқларга Россия томонидан совға қилингани ҳақидаги гапларидан кейин Қозоғистон Ташқи ишлар вазирлиги Россиянинг вақтинчалик ишончли вакили Александр Комаровни чақириб олди. Бу ҳақда Meduza хабар бермоқда.

Идора россиялик дипломатга расмий шахс томонидан жамоатчилик олдида айтилган бундай гаплардан таажжубланиш изҳор этилган нотани топширди. ТИВда қайд этишларича, «россиялик баъзи сиёсатчиларнинг Қозоғистонга нисбатан гиж-гижловчи хуружлари кўпайиб қолиши иттифоқдошлик муносабатларига жиддий зарар етказади».

Қозоғистон ТИВнинг бундай муносабатига сабаб бўлган гап Никонов томонидан «Биринчи канал»даги «Катта ўйин» кўрсатуви эфирида айтилган эди.

«Қозоғистон ўзи мавжуд эмасди, шимолий Қозоғистонга умуман қадам босилмаган эди. Улар анча жануброқда яшар эди. Аслини олганда , Қозоғистон ҳудуди — бу Россия ва Совет иттифоқи томонидан берилган катта совға», — деди Никонов.

«Қозоғистон ТИВ Россия томонидан бундай гапларга тегишлича баҳо берилишини кутмоқда ва бундан кейин Россия Федерацияси давлат арбобларининг бундай баёнотлар беришига йўл қўймаслик бўйича чоралар кўришга чақиради. Россия дипломатига Қозоғистон ТИВ позицияси ифода этилган нота топширилди», — дейилади вазирлик хабарида.

Meduza қайд этишича, Россия федерал телеканалларидаги сиёсий ток-шоулар эфирлари иштирокчилари собиқ иттифоқ республикалари ўз ҳудудлари ёки СССР даврида уларга киритилган манбалар учун Россиядан миннатдор бўлиши кераклиги ҳақида мунтазам равишда фикр билдиради. Кўпинча бундай фикрлар Украинага тегишли бўлади. Одатда бундай баёнотлар расмий муассасалар томонидан эътиборсиз қолдирилади.

Аввалроқ Путин СССР республикаларига «рус халқи томонидан берилган совғаларни» эслаб ўтган эди. «Совет Иттифоқини ташкил этиш битимида ундан чиқиш ҳуқуқи ҳақида ёзилган, бироқ жараён ҳақида ҳеч нарса дейилмагани сабаб савол юзага келади: бирор-бир республика Совет Иттифоқи таркибига кирса, бироқ Россиянинг улкан ерларига, Россиянинг тарихий ҳудудларига эга бўлиб, тўсатдан иттифоқ таркибидан чиқишга қарор қилса, ҳеч бўлмаганда қандай кирган бўлса, шундай чиқсин. Ўзи билан рус халқининг совғаларини олиб кетмасин. Ахир буларнинг ҳеч бири ёзилмаган. Мутлақо ишончим комилки, Конституцияга ўзгартириш киритиб тўғри қиляпмиз», — дейди Россия президенти.