“Адолатли Россия – ҳақиқат учун” партияси етакчиси Сергей Миронов россиялик иш берувчиларни меҳнат муҳожирларига Россия фуқароларидан кам бўлмаган миқдорда маош тўлашга мажбурлашни таклиф қилди, деб ёзмоқда “РИА Новости”.
“Иш берувчиларни меҳнат муҳожирларига Россия Федерациясининг тегишли субъектида бир хил лавозимларда ишлайдиган Россия фуқаролари оладиган маошдан кам бўлмаган иш ҳақини белгилашга қонунчилик даражасида мажбурлаш таклиф этилади”, — дейилади Россия бош вазири Михаил Мишустинга юборилган ҳужжатда.
Миронов ушбу ташаббусни бузганларга жарима солиш ва уларни “кўп болали оилалар ҳаётини яхшилаш”га йўналтириш кераклигини айтди.
Бундан ташқари, мамлакатда кўп болали оилаларни қўллаб-қувватлаш ва туғилиш даражасини ошириш жамғармасини ташкил этиш зарурлиги ҳам қайд этилган. Ушбу жамғармани молиялаштириш, бошқа нарсалар қатори, муҳожирлар меҳнатидан фойдаланадиган иш берувчилар учун қўшимча солиқ ҳисобидан бўлиши мумкин. Солиқ меҳнат муҳожирлари даромадининг 2 фоизи миқдорида белгиланиши мумкин.
Сиёсатчи Россиядан бошқа давлатларга пул ўтказмалари мавзусига ҳам тўхталиб ўтди. Унинг фикрига кўра, бундай ўтказмалар “Россиянинг иқтисодий салоҳияти заифлашишига олиб келади”, шунинг учун 1 фоизлик комиссия жорий қилиниши керак.
Изоҳ (0)