Қирғизистон Маданият, ахборот, спорт ва ёшлар сиёсати вазирлиги россиялик артист Моргенштерннинг концертини бекор қилиши мумкин. Бу ҳақда “AKIpress” хабар берди.
Депутат Алишер Козуев чет эллик ижрочиларнинг Қирғизистонда концерт ўтказишига розилик бериш масаласига ойдинлик киритди:
“Ижтимоий тармоқларда Моргенштерн тез орада мамлакатга келиши ҳақида маълумотлар бор, у артистми ёки ким? Қўшиқ ижрочиси концерт бермоқчи. Биз чора кўришимиз керак. Наҳотки хоҳлаган одам Қирғизистонга келиб, концерт қўя олади?”
Вазир Алтинбек Мақсутовнинг сўзларига кўра, ҳукумат тадбирлари қачон ўтказилишини мувофиқлаштириш мумкин, агар бу шахсий тадбир бўлса, қонун бўйича аралашиб бўлмайди.
“Аммо биз унинг саҳнадаги чиқишини бекор қилишга ҳаракат қилишимиз мумкин”, — дейди вазир.
Моргенштерннинг Бишкекдаги чиқиши 23 июнь куни АLGА FESТ фестивали доирасида бўлиб ўтиши режалаштирилган.
Маълумот учун: Моргенштерн — россиялик реп ва эстрада артисти, мусиқачи, шоумен.
У 2017 йилда ўша пайтдаги машҳур санъаткорларга YouTube’да пародия қилиш орқали шуҳрат қозонган.
2022 йилнинг февралида Моргенштерн ижтимоий тармоқларда гиёҳванд моддалар савдосида айбланганидан кейин Россияни тарк этган.
Россияда унга нисбатан Жиноят кодексининг 330.1-моддаси 2-қисми (бир йил давомида икки марта маъмурий жавобгарликка тортилганидан кейин шахс томонидан чет эл агенти фаолияти тартибини бузиш) бўйича жиноий иш очилган.
Тергов маълумотларига кўра, у ўзининг Telegram каналидаги постларида хорижий агент мақомини кўрсатмаган.
Моргенштерн Дубайга кўчиб ўтган ва у ерда Россиядаги мулкини сотиб, Форс кўрфазидан уй сотиб олган.
Эслатиб ўтамиз, аввалроқ Россиянинг “Порнофильми” гуруҳи Қирғизистон хавфсизлик кучларининг босими туфайли Бишкекдаги концертини бекор қилганди. Бу ҳақда мусиқачилар Instagramъдаги саҳифаларида маълум қилган.
Шунингдек, Бишкекда “Би-2” рок гуруҳининг 18 июнь куни бўлиб ўтиши керак бўлган концерти ҳам бекор қилинган. Бунга ташкилотчиларнинг ички муаммолари сабаб бўлган.
Изоҳ (0)