Chechenistonda huquqbuzarlar, jumladan, yo‘l harakati qoidalarini buzuvchilar “maxsus harbiy operatsiya” (Rossiya Ukrainadagi urushni shunday nomlaydi) zonasiga yuboriladi. Bu haqda respublika rahbari Ramzan Qodirov xabar berdi.
Qodirob kuch tuzilmasi qo‘mondonlari va rahbarlari bilan o‘tkazilgan yig‘ilishda muammoli yoshlar bilan yanada samaraliroq ishlash zarurligini aytdi. U yoshlar orasida muntazam ravishda huquqbuzarlik sodir etib, “bekorchi, axloqsiz turmush tarzini” olib borayotganlar ham borligini ta’kidladi.
Checheniston rahbari bunday huquqbuzarliklar qatoriga yo‘l harakati qoidalarini qasddan buzish, belgilanmagan joyda to‘xtash va taqiqlangan moddalar ta’sirida transport vositasini boshqarishni kiritdi.
“Biz bunday buzg‘unchi va tartibbuzarlarni bir necha bor ogohlantirganmiz. Bundan keyin ular bilan gap qisqa bo‘ladi. Agar qonunga hurmat qilmasang — yo maksimal muddat bilan qamoqqa tushasan, yoki shartnoma imzolab ”maxsus harbiy operatsiya” zonasiga jo‘naysan. O‘sha yerda dushmanga o‘z jasoratingni, dovyurakligingni va epchilligingni ko‘rsatasan”, dedi Qodirov.
Checheniston rahbari bunday yondashuv huquqbuzarlarni ma’muriy javobgarlikka tortishdan ko‘ra maqsadga muvofiqroq bo‘lishini aytdi. U respublikada 2,5 ming kishilik yangi polkning shakllantirilishini hisobga olib, buni “o‘rinli” deb atadi. Shuningdek, u Davlat dumasi deputati Adam Delimxonovga masalani nazoratga olishni topshirdi.
Sentyabr oyi oxirida Ramzan Qodirov respublikada qo‘shimcha zaxira bo‘linmalarini tashkil etish imkoniyati ko‘rib chiqilayotganini ma’lum qilgandi. U bu borada “joylardagi mas’ullarga” topshiriqlar berilganini aytgan.
Izoh (0)