“Joker-2”нинг дебюти омадсизликка учради: фильм кассаларда кутилгандан икки баробар кам маблағ йиғди

“Joker: икки кишилик телбалик” фильмининг дебюти анъанага кўра дам олиш кунларида Америка кинотеатрларида бўлиб ўтди, аммо премьеранинг илк кунларда атиги 40 миллион доллар йиғди. Бу кўрсаткич танқидчиларнинг энг пессимистик прогнозларидан ҳам паст эди, деб ёзади “Правила жизни”.

Фильм ДC олами қаҳрамонлари ҳақидаги барча фильмлар орасида энг муваффақиятсиз лойиҳалардан бирига айланди. Жаред Лето иштирокидаги “Морбиус” фильми ҳам ўз вақтида худди шундай натижа кўрсатган эди. “Joker” нинг давоми ҳатто “Флеш” (55 миллион доллар) ва “Қора Адам” (57 миллион доллар) фильмларидан ҳам пастроқ рейтингни эгаллади.

“Joker: икки кишилик телбалик” нинг бюджети тахминан 200 миллион долларни ташкил этди. Ишлаб чиқариш харажатларини қоплаш учун фильм дунё кассаларида тахминан 500 миллион доллар тўплаши лозим. Аммо лойиҳанинг омадсиз дебюти ҳисобга олинса, буни амалга ошиши қийин масала.

“Joker” нинг биринчи қисми АҚШда бўлиб ўтган премьеранинг илк кунларида 93,5 миллион доллар фойда келтирган эди, бу эса фильмни яратиш харажатларининг (55 миллион доллар) тахминан тўрт баравар кам миқдори эди.

Cinemascore — кинотеатрларни тарк этаётган томошабинлардан олинган сўровнома асосида янги фильмларга рейтинг берувчи компания маълумот беришича, фильм Д, яъни “икки” баҳо олган. Бу комикслар тарихидаги томошабинлар томонидан берилган энг паст баҳодир.

Танқидчилар режиссёр Тодд Филлипснинг янги фильми биринчи дам олиш кунларида дастлаб 70 миллион доллар, кейин эса 55–60 миллион доллар ишлаб топишини башорат қилган эди, бироқ лойиҳа кутилган натижани бермади. Мутахассислар фильм муваффақиятсизлигига мюзикл жанри сабаб бўлди, деб ҳисобламоқда, чунки мусиқий фильмларга томошабинлар орасида талаб юқори эмас.

“Joker” фильмининг иккинчи қисми премьераси 4 сентябрь куни Венеция кинофестивалида бўлиб ўтди. Унда биринчи фильмдаги каби бош ролни актёр Хоакин Феникс ижро этди. Леди Гага эса унинг қаллиғи — Ҳарли Квин ролини ўйнади. Янги қисмнинг воқеалари оригинал “Joker” фильмидан икки йил ўтгач содир бўлади. Артур Флек Аркҳем руҳий касалхонага тушиб қолади. Айнан шу ерда комик ўз севгисини —  Ҳарли Квиннни учратади.