Америка киноакадемияси «Оскар—2020» мукофоти учун номзодларни эълон қилди, деб хабар бермоқда Meduza. Тақдирлаш маросими 9 февраль куни Лос-Анжелесда бўлиб ўтади.
Аввал хабар берилганидек, бу йилги «Оскар» мукофотлари топшириш маросими бошловчисиз ўтади. Бундай ҳол тарихда учинчи бор ва қаторасига иккинчи йил содир бўлмоқда.
Хабарда айтилишича, 2020 йилнинг энг яхши фильми номига «Ford Ferrari’га қарши» («Ford vs Ferrari»), «Ирланд» («Irishman»), «Қуён Жожо» («Jojo Rabbit»), «Жокер» («Joker»), «Кичик аёллар» («Little Women»), «Никоҳ тарихи» («Marriage Story»), «1917», «Бир куни...Ҳолливудда» («Once Upon a Time...in Hollywood»), «Паразитлар» («Parasite») фильмлари давогарлик қилмоқда.
Энг яхши режиссёр учун «Оскар»ни Мартин Скорсезе — «Ирланд» («Irishman»), Тодд Филлипс — «Жокер» («Joker»), Сем Мендес — «1917», Квентин Тарантино — «Бир куни...Ҳолливудда» («Once Upon a Time...in Hollywood»), Пон Жун-хо — «Паразитлар» («Parasite») олиши мумкин.
Энг яхши актёр номига Антонио Бандерос — «Азоб ва шараф» («Pain and Glory»), Леонардо Ди Каприо — «Бир куни... Ҳолливудда» («Once Upon a Time...in Hollywood»), Адам Драйвер — «Никоҳ тарихи» («Marriage Story»), Хоакин Феникс — «Жокер» («Joker»), Донатан Прайс — «Икки папа» («The Тwo Popes») даъвогарлик қилмоқда.
Энг яхши актриса мукофотига эса Синтия Эриво — «Ҳарриет» («Harriet»), Скарлет Йоханссон — «Никоҳ тарихи» («Marriage Story»), Сирша Ронан — «Кичик аёллар» («Little Women»), Шарлиз Терон — «Можаро» («Bombshell»), Рене Зелвеггер — «Жуди» («Judy») номзод қилиб кўрсатилган.
Ўзбекистондан эса Режиссёр Умид Ҳамдамовнинг «Иссиқ нон» кинокартинаси «Оскар» мукофотига «Энг яхши халқаро бадиий фильм» номинацияси бўйича даъвогарлик қиладиган фильмлар рўйхатига киритилган эди.
«Оскар—2020» мукофоти учун номзодларнинг тўлиқ рўйхати билан киноакадемия сайтида танишиш мумкин.
Изоҳ (0)