Актёрлик ташқаридан осон кўринса-да, ушбу касб ҳам кўплаб қурбонликларни талаб этади. Биринчи навбатда унинг вазифаси ўз қаҳрамонининг характерини чуқур ўрганиш ва томошабинларга ишончли тарзда етказишдир. Бунинг учун актёрлар баъзан ўз саломатлиги ва қадриятларини қурбон қилишга ҳамда жиддий таваккал қилишига тўғри келади.
Киллиан Mёрфи — “Оппенгеймер”
Бирор рол учун парҳез қилиш балки сиз учун янгилик эмасдир, аммо Киллиан Mёрфи амал қилган ўта қаттиқ парҳезга кўпчилик дош бера олмайди. Актёрнинг ҳамкасби Эмили Блантнинг айтишича, кундузи Киллиан фақат бир нечта бодом ейиши ва сув ичиши мумкин эди. Буларнинг бари актёрнинг қаҳрамон характери ва ташқи кўринишига максимал ўхшаш бўлиши учун қилинган.
Мен фильм қаҳрамони учун ўта озғин кўринишим кераклиги сабабли қаттиқ парҳез тутганман. Шундай вақтлар ўзингиз билан рақобатлашишга мажбурсиз, аммо мен қилган ишни ҳеч кимга тавсия этмайман, дейди Mёрфи.
Орландо Блум — “Чандиқ”
Орландо Блум ҳам карьераси давомида худди шунга ўхшаш вазиятга дуч келган. Бундай тавсия диетолог томонидан берилган эди:
Мен сёмка вақтида жуда оч қолишга мажбур эдим. Сўнгги уч ҳафта давомида Лондонда суратга олиш бошланишидан аввал биз фақат тунец балиғи ва бодринг истеъмол қилганмиз, дейди актёр.
Умумий ҳисобда Блум 24 килограмм вазнни йўқотди. Шунингдек, бундай парҳездан кейин унинг соғлиғида муаммолар пайдо бўлди.
Хоакин Феникс — “Joker: икки киши телбалиги”
“Joker” афсонавий роли учун актёр 25 килограмм вазн ташлашига тўғри келган. Бироқ фильмнинг ортидан келган муваффақиятлар юқоридаги фидокорликка арзийди. “Joker”нинг иккинчи қисмида эса Хоакин диета тутиши шарт эмасди, аммо кўпроқ жисмоний машқлар қилишга мажбур эди:
Бу сафар мен учун қийинроқ бўлди, чунки биз кўп рақсларни машқ қилар эдик. “Joker: икки киши телбалиги” фильми мен учун қийинроқ бўлди. Аммо энг асосийси, соғлиқ учун хавфсизроқ эди, дейди актёр.
Леди Гага — “Joker: икки киши телбалиги”
Феникснинг ҳамкасби ҳам ўзига яраша қурбонликлар қилишига тўғри келди. Ҳарли Квинн образига мослашиш учун хонандага суратга олиш пайтидан ташқари ҳам фильм қаҳрамони исми билан мурожаат қилинган. Чунки Леди Гага ўзининг Стефани исмига жавоб бермаган ва ўз ролига жиддий киришиб кетган.
Ҳью Жекман — “Дедпул ва Росомаха”
Ҳью Жекман ҳам ҳамкасблари каби “Дедпул ва Росомаха” фильмидаги образи учун қийинчиликларга дуч келди. Актёр етарли вазн орттириш учун кўпроқ овқатланиши ва спорт билан шуғулланиши керак эди. Бир қарашда бунинг ҳеч қандай қийин жойи йўқдек туюлади, аммо актёрнинг ўзи интервьюда шундай деди:
Мен Росомаха образини гавдалантириш учун жуда кўп овқатланишим керак эди. Бироқ мен табиатан озғин инсонман. Шу сабабли ролга тайёргарликнинг энг қийин қисми мен учун вазн орттириш бўлган, дейди Ҳью Жекман.
Ричард Гедд — “Кийик боласи”
Ричард Гедд “Кийик боласи”нинг нафақат сценарий муаллифи, балки сериалнинг бош қаҳрамони ҳам эди. Бир вақтнинг ўзида икки муҳим ишни бажариш актёрга осон бўлмаган:
Суратга олиш майдонига машинада кетаётган пайт тирбандлик ёки бирор воқеа сабабли ишга кечикишга умид қилардим. Чунки ишни бошлашдан аввал хаёлларимни бир жойга қўйишга вақтим бўлар ва фикрларимни тартибга келтирар эдим, дейди Гедд.
Изоҳ (0)