“Joker: ikki kishilik telbalik” filmining debyuti an’anaga ko‘ra dam olish kunlarida Amerika kinoteatrlarida bo‘lib o‘tdi, ammo premyeraning ilk kunlarda atigi 40 million dollar yig‘di. Bu ko‘rsatkich tanqidchilarning eng pessimistik prognozlaridan ham past edi, deb yozadi “Pravila jizni”.
Film DC olami qahramonlari haqidagi barcha filmlar orasida eng muvaffaqiyatsiz loyihalardan biriga aylandi. Jared Leto ishtirokidagi “Morbius” filmi ham o‘z vaqtida xuddi shunday natija ko‘rsatgan edi. “Joker” ning davomi hatto “Flesh” (55 million dollar) va “Qora Adam” (57 million dollar) filmlaridan ham pastroq reytingni egalladi.
“Joker: ikki kishilik telbalik” ning byudjeti taxminan 200 million dollarni tashkil etdi. Ishlab chiqarish xarajatlarini qoplash uchun film dunyo kassalarida taxminan 500 million dollar to‘plashi lozim. Ammo loyihaning omadsiz debyuti hisobga olinsa, buni amalga oshishi qiyin masala.
“Joker” ning birinchi qismi AQSHda bo‘lib o‘tgan premyeraning ilk kunlarida 93,5 million dollar foyda keltirgan edi, bu esa filmni yaratish xarajatlarining (55 million dollar) taxminan to‘rt baravar kam miqdori edi.
Cinemascore — kinoteatrlarni tark etayotgan tomoshabinlardan olingan so‘rovnoma asosida yangi filmlarga reyting beruvchi kompaniya ma’lumot berishicha, film D, ya’ni “ikki” baho olgan. Bu komikslar tarixidagi tomoshabinlar tomonidan berilgan eng past bahodir.
Tanqidchilar rejissyor Todd Fillipsning yangi filmi birinchi dam olish kunlarida dastlab 70 million dollar, keyin esa 55–60 million dollar ishlab topishini bashorat qilgan edi, biroq loyiha kutilgan natijani bermadi. Mutaxassislar film muvaffaqiyatsizligiga myuzikl janri sabab bo‘ldi, deb hisoblamoqda, chunki musiqiy filmlarga tomoshabinlar orasida talab yuqori emas.
“Joker” filmining ikkinchi qismi premyerasi 4-sentyabr kuni Venetsiya kinofestivalida bo‘lib o‘tdi. Unda birinchi filmdagi kabi bosh rolni aktyor Xoakin Feniks ijro etdi. Ledi Gaga esa uning qallig‘i — Harli Kvin rolini o‘ynadi. Yangi qismning voqealari original “Joker” filmidan ikki yil o‘tgach sodir bo‘ladi. Artur Flek Arkhem ruhiy kasalxonaga tushib qoladi. Aynan shu yerda komik o‘z sevgisini — Harli Kvinnni uchratadi.
Izoh (0)