«Жокер» 2020 йилда Буюк Британияда энг кўп томоша қилинган фильмга айланди

Британия телевизион кўнгилочар ассоциацияси (BASE) томонидан тақдим этилган ҳисоботга кўра, Тодд Филлипснинг «Жокер» картинаси Буюк Британияда энг кўп томоша қилинган фильмга айланди. Гап дисклар ва VOD-платформалар орқали уй шароитида томоша қилиш ҳақида кетмоқда. «Жокер»нинг турли форматлардаги савдоси 1,4 миллион нусхани ташкил этган, деб хабар беради «Film.ru».

Шунингдек, Топ-5 етакчилар рўйхатидан «Музюрак-2» (1,3 миллион), «Жуманжи: Янги босқич» (1,1 миллион), «1917» ва «Юлдузлар жанги: Скайуокернинг уйғониши» картиналари ўрин олган.

Расмий статистикага кўра, мамлакатда уй шароитида томоша қилиш улуши 2019 йилга нисбатан 26 фоизга ошган. Шундай қилиб, мазкур соҳадаги кирим 4,7 миллиард долларни ташкил этмоқда.

Disney+, HBO ҳамда 2020 йилда пайдо бўлган стриминг сервисларнинг уй шароитида томоша қилиш бўйича бозордаги улуши 74 фоизга етган.

Маълумот учун, «Энг яхши актёр» йўналишида 2020 йилги «Оскар» мукофоти «Жокер» фильмидаги ижроси учун Хоакин Фениксга насиб этган.