“Ғийбат ва миш-мишлардан депрессияга тушиб қолгандим”. “Чолиқуши” сериали юлдузи Айдан Шенер оиласи нима сабабдан дарз кетгани ҳақида

Рашод Нури Гунтекиннинг “Чолиқуши” асари асосида 1986 йилда суратга олинган шу номли сериал ўзбек томошабинларининг қалбидан жой олган. Сериал бош роль — Фериде образини ижро этган актриса Айдан Шенерга катта муваффақият ва машҳурлик олиб келган.

Актриса турк телешоулардан бирига берган интервьюсида шахсий ҳаёти ҳақида сўз очди. 1981 йилда “Мисс Туркия” унвонига сазовор бўлган вақтда Айдан 18 ёшда эди.

Ўша даврни эслаб, Шенер актрисаликни танлаганидан пушаймонлигини сўзлаб берди:

Мен жуда ёш эдим. Гўзаллик конкурслари кўплаб қизлар учун актрисалик фаолиятини бошлаш учун пойдевор бўлади. Мен эса бу йўлни атрофимдагилар қистовига кўра танладим, — дейди актриса.

Шунингдек, Айдан шоу-бизнес оламида хиёнат жуда кўп эканлигидан шикоят қилди, зеро у садоқатни энг олий фазилат деб ҳисоблайди.

Ҳозирги замонда садоқатни қадрламайдилар. Масалан, мен хиёнатга учрасам, ўша инсондан қасос олмайман, шунчаки уни ҳаётимдан чиқариб юбораман. Кино оламида кўп бор ноҳақликка дуч келдим, бунга чидолмай исён кўтардим, баҳслашдим. Афсуски, ғийбат ва миш-мишлар туфайли депрессияга тушиб қолдим. Шу сабабли актрисалик касбини танлаганимдан афсусда эдим, — дея сўзида давом этди Айдан.

Ҳозирда фикрим ўзгарган ва мен аввалгидан ҳам бахтлиман. Машҳурлигим ва мухлисларнинг меҳридан завқланаман, — дея тан олди у.

Айдан Шенер қисқа муддат давом этган турмуши ҳақида ҳам айтиб ўтди:

Мен жуда эрта — 19 ёшимда турмушга чиқдим. Фикримча, никоҳ инсон табиатига зид нарса, — деди актриса.

Айдан 30 йилдан бери ёлғиз яшайди. У эркинликни яхши кўради. Унинг собиқ турмуш ўртоғи Туркия терма жамоаси ва “Галатасарой” клуби футболчиси Айхан Акбин ундан саккиз ёш катта эди. Улар мода кўргазмасида танишиб қолишган ва бир йилдан сўнг турмуш қуришган. Уларнинг қизи уч ёшга тўлганда жуфтлик ажрашиб кетди.

Акбин рафиқаси уйда ўтириши ва фақат рўзғор билан банд бўлишини истар, ўша пайтлар Шенерга катта лойиҳаларда иштирок этиш таклифлари келиб тушарди. Айданнинг турмуш ўртоғи аёлининг машҳурлигига чидай олмас, қаттиқ рашк қилар эди. Туғилган кунига эри паранжи совға қилганида актрисанинг сабри тугади ва ажримга қарор қилди.

 Мен мусулмонман ва Аллоҳга ишонаман, лекин рўмол ўрай олмайман, — дейди Айдан.