Тан олиш керак, улғайган бўлсак-да, ҳали ҳам мультфильм томоша қилишни яхши кўрамиз. Яхшиямки, замонавий аниматорлар доимий равишда янги мультфильмларни тақдим этади. Уларнинг кўпчилиги болалигимиздаги мультфильмлардан қолишмайди, албатта, хатолар ҳам бор.
“Простоквашино”
Янги “Простоквашино”нинг иккинчи эпизодида почтачи Печкиннинг велосипедида ғалати ҳолат юз беради. У музқаймоқ етказиб беришни бошлайди. Аммо велосипеднинг эгари гоҳ аравачага яқинлашади, гоҳ ундан узоқлашади — велосипед рамасида ҳам худди шундай ҳолат кузатилади.
“Ойбола ва унинг дўстлари”
Мультфильмда Ойбола ҳовуз тубида балиқ билан тўп ўйнайди. Аммо бундай ўйинчоқларнинг одатда ичи бўш бўлишига қарамай, негадир тўп сув юзасига чиқмайди.
“Уч баҳодир денгиз ортида”
Княз Владимир ва Юлий ўртасидаги суҳбат пайтида орқа фонда контрфорс (биноларда деворни мустаҳкамлаб, унинг оғиб кетишига йўл қўймайдиган тиргак) аниқ кўринади. Бир неча сониядан сўнг, Пўстдумба арава билан залга киради ва расмлар орасидаги девор текис бўлиб қолади.
Алёша Поповичнинг кўйлаги ёқасида учбурчакларнинг жойлашиши ҳам бирдан ўзгаради. Аввалига қизил ранг пайдо бўлади ва бир неча сониядан кейин — тўқ сариқ. Бу вақт ичида қаҳрамон кийим алмаштиришга улгуролмасди ахир.
“Алёша Попович ва Тугарин илонбош”
Баҳодирлар ҳақидаги франшизанинг биринчи мультфильмида ҳам хатолар бор. Умумий кадр яқинроқ кўрсатилганда, Любаванинг елкаси ва рўмолидаги тиканлар йўқолиб қолади. Унинг ортидан келаётган кампир ҳам бу тиканларни олишга улгурмай қоларди.
“Добриня Никитич ва Змей Горинич”
Қирол қўшиқ айтаётган қизларга буталар орасидан мўралаб қараётганда, унинг қўлидаги ҳассаси гоҳ пайдо бўлади, гоҳ ғойиб бўлади.
Худди шу нарса Уч бошли аждарнинг уйида содир бўлади. Улар келган меҳмонлар олдига дастурхон ёзади, ҳар хил таомларни қўяди. Сабзини қўймоқчи бўлган Уч бошли аждар столга ўгирилганда негадир идиш бўшаб қолади.
“Мурватчалар: Катта сир”
Мурватчалар диванда ўтириб, телевизор кўраётганда Симканинг орқасида турган тахта бўлагига эътибор беринг. Катта планда у тўсатдан позициясини ўзгартиради, бундан ташқари, ёрқин пушти элемент тахтанинг энг юқори қисмида жойлашган.
“Қувноқ дўмбоқчалар”
Ушбу анимацион сериалнинг турли эпизодларида кўплаб хатолар ва кутилмаган бурилишлар мавжуд. Масалан, “Скамейка” қисмида Қуёнвой скамейкадан узоқлашиши биланоқ “Бўялган” ёзуви йўқолади.
Олов устидаги қорайган чойнак қанчалик тез тоза бўлиб қолганини пайқадингизми? Ушбу кадрда Қарғавойнинг бир сония ичида пайпоғини алмаштиришга улгурганини ҳам кўриш мумкин. Пaйпоқдаги чизиқлар қизилдан тўқ сариққа айланади, пайпоқнинг ранги эса яшил эмас, балки сарғайиб кетади.
“Шаҳзода Иван ва бўз бўри”
Василиса Иваннинг олдига келганда, қаҳрамонлар орасидаги бўшлиқда эшикнинг бир табақали экани аниқ кўринади. Кейинги кадрда уларнинг бир-бирини қучоқлагани акс этган, шу пайт фондаги эшик сирли тарзда қўш табақали эшикка айланади.
“Қизалоқ ва маймоқ”
“Биринчи учрашув” эпизодида Айиқ Машани уйдан ҳайдаб чиқарганда, ёпилган эшикда оғир лўкидон ва катта михлар турибди. Аммо бир неча сониядан кейин эшик ичкарига очилганда, юзаси бутунлай силлиқ бўлиб қолади.
“Уч мушук”
“Мусиқий табрикнома” қисмида мушуклар оиласи биргаликда дўконга боради. Уларга Рождество арчаси туширилган откритка ёқиб қолганди: яқинроқда турган Коржик уни олмоқчи бўлади. Бир лаҳза олдин арча бутунлай бошқача чизилганди — безаклар тўсатдан ғойиб бўлади ва фон яшил рангдан ёрқин сариқ рангга ўзгаради.
Изоҳ (0)