Kuzning iliq va qulay muhitiga oshno qiladigan multfilmlar ro‘yxatini to‘pladik – kuzgi kayfiyatga sho‘ng‘ishni istagan paytingiz tomosha qilish yoqimli bo‘ladi.
“Ernest va Selestina: yangi sarguzashtlar”
Ernest va Selestina shunchaki do‘st emas, chunki ularning biri ayiq, ikkinchisi sichqon. Bir safar ular Ernestning dunyoning eng iqtidorli musiqachilari yashaydigan ona shahriga borishadi. Ammo yetib borgach, do‘stlar u yerda musiqa ko‘p yillar davomida taqiqlanganligini bilishadi. Ular yangi do‘stlari va sirli niqobli jinoyatchi bilan birgalikda ayiqlar mamlakatiga quvonch keltirishga qaror qilishadi.
“Kichkina Nikolya”
Parijda ikki nafar tinib-tinchimagan odam yashagan — yozuvchi va rassom, ular o‘z sarguzashtlari bilan kulrang kundalik hayotni rang-barang qila oladigan qahramonni o‘ylab topgan. Nikolya shunday paydo bo‘ladi — ota-onasini yaxshi ko‘radigan, maktabga boradigan, do‘stlari bilan muloqot qiladigan va uchuvchi bo‘lishni orzu qiladigan shumtaka bola. Uning asosiy fazilati — hatto eng oddiy narsalarda ham o‘yin-kulgi va zavqlana olish qobiliyatidir.
“Uddaburon janob Foks”
Multfilmda ayyor tulki haqida hikoya qilinadi, u xotinining homiladorligini bilib, jinoiy faoliyatini to‘xtatishga va’da beradi. Ammo baribir u xavfli vaziyatlarga olib keladigan sarguzashtlarga aralashib yuraveradi.
Mashhur Ues Anderson nafaqat “To‘lin oy qirolligi” va “Grand Budapesht mehmonxonasi” uslubidagi eski maktab tragikomediyalarini suratga olishni biladi — u stop-moushn qo‘g‘irchoq animatsiyasida ham mahoratini namoyish qiladi. “Uddaburon janob Foks” filmida Anderson filmlarining barcha eng yaxshi xususiyatlarini saqlab qoladi: drama va hazil uyg‘unligi, zamonaviy kartina, qiziqarli hikoya. Animatsiya unga tasavvur uchun qo‘shimcha imkoniyatlar beradi.
Hamma harakatni tezroq va silliqroq ko‘rsatishga harakat qilayotgan bir paytda, uning qahramonlari shunchaki o‘z joylarida qotib qolishlari va bir-biriga qarashlari mumkin.
“Bo‘rilar afsonasi”
Ushbu multfilm rejissyori Tomm Mur – zamonaviy multfilmlar dunyosining yetakchilaridan biri. U o‘z ishlarida odatda Irlandiya folklori va tarixiga murojaat qiladi. “Bo‘rilar afsonasi”da voqealar 1650-yilda Irlandiyaning Kilkenni shaharchasida bo‘lib o‘tadi. Asosiy qahramon Robin – ovchining qizi bo‘lib, u otasi bilan birga Angliyadan Kilkenniga ko‘chib keladi. Otasi Robinni himoya qilish maqsadida unga uyidan chiqishni taqiqlaydi, chunki shahar atroflarida bo‘rilar bor. Ammo bu oddiy bo‘rilar emas, afsonalarga ko‘ra, odam-qiyofasiga kiradigan jonzotlar. Biroq Robin qo‘l qovushtirib o‘tiradigan qizlardan emas. U ham o‘q-yoydan yaxshi foydalanadi. Shuning uchun imkon tug‘ilishi bilanoq u yashirincha o‘rmonga qochib ketadi.
“Hilda”
Multserial britaniyalik rassom Lyuk Pirsonning komikslariga asoslanib suratga olingan. Pirson “Hilda” haqidagi hikoyalarni yaratishda Skandinaviya mifologiyasidan ilhomlangan. Multserial syujetiga ko‘ra, qiziquvchan va faolligi bilan ajralib turadigan Hilda onasi va uy jonivori — Tvig bilan o‘rmonda yashaydi. U kun bo‘yi atrofni o‘rganib, turli xil sehrli mavjudotlar bilan muloqot qiladi: elflar, gigantlar va Poleno ismli g‘aroyib maxluq. Bir kuni onasi unga oddiy bolalikni ta’minlash uchun Hildani yaqin atrofdagi Trollberg shahriga ko‘chirishga qaror qiladi. Avvaliga Hilda onasining bu fikriga qarshi bo‘lsa-da, oxir-oqibat bu qarorni qabul qiladi. Axir uning hayotidan sehr va sarguzashtlar baribir hech qayerga yo‘qolmaydi.
“Kvab va Jab”
Yoqimli, kulgili va ba’zan g‘alati hikoyalar ikki eng yaxshi do‘st – Kvak va Jabb laqabli baqalar hayotidan olingan. Ular bir-biriga butunlay zid: Kvak faol va sarguzashtlarni yaxshi ko‘radi, Jabb esa haqiqiy uyquchi. Ammo ular bir-birini ajoyib tarzda to‘ldiradi va doim birga vaqt o‘tkazadi, o‘rmonning boshqa aholisini ham o‘z sarguzashtlariga tortib ketadi. Bularning barchasi hayot va do‘stlik haqida falsafiy suhbatlar bilan boyitilgan.
Izoh (0)