Поп-MMAда иштирок этиш ва бундай жангларда ўзини тутиш Чеченистоннинг анъаналари ва қадриятларига зид келади, шунинг учун республика вакиллари бундай фаолиятдан воз кечиши керак. Бу ҳақда Чеченистон жисмоний тарбия ва спорт вазири Ахмат Қодиров ўзининг Telegram каналида маълум қилди.
“Сизнинг беҳаё сўзларингиз ва одобсиз хатти-ҳаракатларингиз нафақат ўзингизни камситади, балки бутун чечен халқини ҳамда бутун мусулмон жамиятини шарманда қилади. Сиз бизнинг урф-одатларимизни сақлаш ва ривожлантиришга ҳаракат қилаётган юз минглаб одамларнинг саъй-ҳаракатларини шубҳа остига қўясиз”, дея у поп-MMAда иштирок этаётган чеченларга мурожаат қилди.
Қодиров уларни “анъана ва маданиятга мос турнирларга эътибор қаратишга” чақирди.
“Бу охирги огоҳлантириш. Поп-MMA бўйича фаолиятингизни тўхтатинг. Акс ҳолда аниқ чоралар кўрилади. Биз бундай хатти-ҳаракатларга энди тоқат қила олмаймиз ”, дея қўшимча қилган Ахмат.
Чеченистон раҳбари Рамзан Қодиров ўғлининг нашрини ўз саҳифасида қайта жойлаштирган.
Май ойида 18 ёшли кичик Қодиров республика жисмоний тарбия ва спорт вазири этиб тайинланган эди. Февраль ойидан буён Ёшлар ишлари вазири, унгача Жисмоний тарбия ва спорт вазирининг биринчи ўринбосари лавозимида ишлаб келган. Кичик Қодиров, шунингдек, “Биринчилар ҳаракати” болалар ва ёшлар ҳаракатининг Чеченистондаги минтақавий бўлими бошқаруви раиси бўлган.
Изоҳ (0)