Сўнгги ҳафталарда Чеченистон раҳбари Рамзан Қодиров оғир касал ва комада бўлиши мумкинлиги ҳақида миш-мишлар тарқалди. Ингуш журналисти Магомед Ториев Фреедом нашрига берган интервьюсида Қодировнинг ўрнини эгаллаши мумкин бўлган номзодларни айтди.
Ториевнинг сўзларига кўра, Чеченистондан ҳам, кўп сонли чечен диаспораси яшайдиган Европадан ҳам Қодировнинг аҳволи ёмонлиги ҳақида ҳеч қандай далил йўқ. Шунга қарамай, журналист агар Қодиров ҳақиқатан ҳам комада бўлса, “Кремль унинг ўрнини ким эгаллашини ҳал қилмагунча комада қолишини” таъкидлади. У Қодиров Москвада даволанаётгани тасдиқланса ҳам, Кремль буни ошкор қилмаслигини билдирди.
У Рамзан Қодиров ўрнига келиши мумкин бўлган уч нафар номзодни айтди:
- Чеченистон Давлат Думаси депутати Адам Делимханов;
- Чеченистон парламенти раҳбари Магомед Даудов;
- Чеченистон бош вазирининг хавфсизлик блоки бўйича ўринбосари ва Ахмат отрядининг қўмондони Абузайд Висмуродов.
Журналистнинг таъкидлашича, Чеченистонда ҳеч ким янги тайинланган раҳбарга қарши чиқмайди.
“Сиёсий ҳаёт, сиёсий партиялар, сўз эркинлиги, мустақил оммавий ахборот воситалари йўқ. Диктатура, конслагер бор. Ким тайинланмасин, Москванинг ёрдамига таянади. Россиядаги губернаторларнинг ҳеч бири ўз ҳудуди, ҳудудий элитаси ёрдамига таянмайди, барчаси Москва томонидан тайинланади. Кремль аҳолининг реакцияси ҳақида ўйлайди, деб ҳисоблашдан фойда йўқ”, — дея хулоса қилди Ториев.
Изоҳ (0)