Ливанда алоқа қурилмаларининг навбатдаги оммавий портлаши содир бўлди

Ливанда, Байрут чеккасида қурилмалар иштирокида навбатдаги портлашлар содир бўлди.

Бу сафар рациялар, уяли телефонлар, автомобиль магнитолалари ва ҳатто уйдаги қуёш батареялари ҳам портлатилгани хабар қилинган.

Ливан Соғлиқни сақлаш вазирлиги томонидан тақдим этилган янгиланган маълумотларга кўра, симсиз алоқа қурилмаларининг янги тўлқини портлаши оқибатида мамлакат бўйлаб камида 9 киши ҳалок бўлган ва 300 дан ортиқ киши жароҳатланган.

Аввалроқ бундай портлашлардан камида биттаси сешанба куни пейжерларнинг портлаши оқибатида ҳалок бўлганларнинг дафн маросимида содир бўлгани хабар қилинган эди. Ҳукумат фуқаролардан портлаш содир бўлган жойлар яқинида тўпланмасликни сўраган.

Ливан армияси қўмондонлиги фуқароларни пойтахтнинг жанубий ҳудудларида бўлиш хавфидан огоҳлантирган. Ҳарбийлар, шунингдек, тиббий гуруҳларнинг келиши учун жой ажратишга чақирган. Reuters’га кўра, қурбонларнинг кўпчилиги қорин ва қўлларидан яраланган. Нашр томонидан қўлга киритилган тасвирларга кўра, бугун портлаган рацияларда ICOM ва “Японияда ишлаб чиқарилган” деган ёзув бўлган.

Веб-сайтга кўра, ICOM - Япониянинг радио ва телефон алоқа компанияси.

Аввалроқ Исроил қўшинлари билан суҳбатлашган мамлакат мудофаа вазири Йоав Галант сўнгги кунларда Ливандаги электрон қурилмалар портлаши ҳақида ҳеч нарса айтмаган. Шу билан бирга, у Исроил армияси ва хавфсизлик хизматларининг ишини юқори баҳолаб, “натижалар жуда таъсирли” эканини таъкидлаган.