Чеченистон раҳбари Рамзан Қодиров “Вагнер” асосчиси Евгений Пригожин бошчилигидаги исённи “жирканч хиёнат” деб атади.
“Содир бўлаётган воқеаларнинг барчаси — орқага урилган пичоқ ва чинакам ҳарбий исён!” — дейилади унинг Telegram каналидаги постида.
Қодиров Владимир Путиннинг мурожаатидаги “ҳар бир сўзни тўлиқ қўллаб-қувватлашини” айтди. Унинг сўзларига кўра, “Мудофаа вазирлиги ва Россия гвардиясининг Чеченистон республикасидаги бўлими жангчилари аллақачон кескинлик зоналарига жўнаб кетган”.
“Биз Россиянинг бирлигини сақлаш ва унинг давлатчилигини ҳимоя қилиш учун ҳамма нарсани қиламиз!”, — деди Қодиров. “Мен жангчиларга – Ватанимиз ватанпарварларига мурожаат қиламан. Провокацияларга берилманг. Сизга қандай мақсадлар қўйилмасин, қандай ваъдалар айтилмасин, бундай пайтда давлат хавфсизлиги ва рус жамиятининг жипслиги ҳамма нарсадан устундир! Кўряпсизми, Ғарбдаги душманларимиз бу вазиятдан қандай фойдаланмоқда. Фуқароларимизни чўчитувчи қанча ахлат, қанча ёлғон мурожаатлар вазиятни беқарорлаштириш хавфини туғдирмоқда. Пригожиннинг хиёнаткор юришидан кутилган оқибатлар ҳам шу”.
Аввалроқ Россия президенти ҳам Пригожиннинг хатти-ҳаракатларини хиёнат ва орқадан пичоқ уриш, деб атаганди. Путин исёнчилар жазоланишини ваъда қилди.
Маълумот учун 23 июнь куни кечқурун Пригожин Россия мудофаа вазири Сергей Шойгуни “Вагнер” лагерларига ракета ҳужуми уюштиришга рухсат беришда айблади. Шундан сўнг Пригожин “адолат маршини” бошлашга ваъда берди, кўпчилик бу таҳдидни ҳарбий тўнтариш уюштиришга уриниш сифатида қабул қилди. Россия Федерал хавфсизлик хизмати Пригожинга қарши қуролли тўнтаришга уриниш бўйича иш очди.
24 июнга ўтар кечаси Ростов-Дон шаҳри “Вагнер” жангчилари томонидан босиб олинди. Шаҳар марказини Евгений Пригожинга бўйсунувчи қуролли шахслар эгаллади. Эрталаб Пригожин Россия Мудофаа вазирлиги ва Бош штаб раҳбарларининг ўринбосарлари билан учрашди. У Сергей Шойгу ва Валерий Герасимов “Вагнер”га топширилмагунча, ёлланма аскарлар “Ростовни тўсиб, Москвагача боришини” айтди.
Изоҳ (0)