Pop-MMAda ishtirok etish va bunday janglarda o‘zini tutish Chechenistonning an’analari va qadriyatlariga zid keladi, shuning uchun respublika vakillari bunday faoliyatdan voz kechishi kerak. Bu haqda Checheniston jismoniy tarbiya va sport vaziri Axmat Qodirov o‘zining Telegram kanalida ma’lum qildi.
“Sizning behayo so‘zlaringiz va odobsiz xatti-harakatlaringiz nafaqat o‘zingizni kamsitadi, balki butun chechen xalqini hamda butun musulmon jamiyatini sharmanda qiladi. Siz bizning urf-odatlarimizni saqlash va rivojlantirishga harakat qilayotgan yuz minglab odamlarning sa’y-harakatlarini shubha ostiga qo‘yasiz”, deya u pop-MMAda ishtirok etayotgan chechenlarga murojaat qildi.
Qodirov ularni “anʼana va madaniyatga mos turnirlarga eʼtibor qaratishga” chaqirdi.
“Bu oxirgi ogohlantirish. Pop-MMA bo‘yicha faoliyatingizni to‘xtating. Aks holda aniq choralar ko‘riladi. Biz bunday xatti-harakatlarga endi toqat qila olmaymiz ”, deya qo‘shimcha qilgan Axmat.
Checheniston rahbari Ramzan Qodirov o‘g‘lining nashrini o‘z sahifasida qayta joylashtirgan.
May oyida 18 yoshli kichik Qodirov respublika jismoniy tarbiya va sport vaziri etib tayinlangan edi. Fevral oyidan buyon Yoshlar ishlari vaziri, ungacha Jismoniy tarbiya va sport vazirining birinchi o‘rinbosari lavozimida ishlab kelgan. Kichik Qodirov, shuningdek, “Birinchilar harakati” bolalar va yoshlar harakatining Chechenistondagi mintaqaviy bo‘limi boshqaruvi raisi bo‘lgan.
Izoh (0)