7 октябрь куни ЎФА раҳбарияти ҳамда бош мураббий Хосе Венансио Лопес иштирокида Ўзбекистон жамоасининг Жаҳон чемпионатидаги иштирокига бағишланган йиғилиш ўтказилди. Унда жамоа бош мураббийи билан шартнома якунига етгани маълум қилинди.
-RuPf8wI5.jpg)
“Терма жамоа ўйинидаги камчиликлар таҳлил қилиниб, уларни бартараф этиш масалалари муҳокама қилинди. Йўл қўйилган камчиликларни бартараф этиш бўйича зарур чоралар кўриш, терма жамоага номзод футболчиларни етказиб бериш йўлида турли ёш тоифасида футзал терма жамоаларини ташкил этиш, клублар ўртасидаги турнирларни кўпайтириш бўйича таклифлар берилди.
Ўз навбатида Хосе Венансио ЎФА раҳбариятига терма жамоа бош мураббийи сифатида ишлаш имконият берилгани учун миннатдорчилик билдирди ва Ўзбекистондаги фаолияти давомида завқ билан ишлагани, барча мутахассислар унга кўмаклашганини айтиб, келгусида дўстона алоқаларни сақлаб қолиб, ҳар қандай ёрдамга тайёр эканини маълум қилди.
ЎФА биринчи вице-президенти Равшан Эрматов испаниялик мутахассисга терма жамоадаги фаолияти учун миннатдорчилик билдириб, унга омад тилади.
Хосе Венансио Лопес билан тузилган шартнома якунланди”, дейилади матбуот хизмати хабарида.
Мураббий 2023 йил 20 сентябрдан Ўзбекистон миллий футзал терма жамоаси бош мураббийи сифатида ишлаб келмоқда. Хосе Лопес бошчилигида Ўзбекистон жамоаси Таиландда ўтказилган Осиё чемпионатида учинчи ўринни қўлга киритди.
Тошкентда ўтказилган футзал бўйича Жаҳон чемпионати Ўзбекистон учун омадсиз келди. А гуруҳидан ўрин олган мезбонлар 3 учрашувнинг 1 тасида дуранг ўйнади ва икки учрашувда мағлубиятга учраб, мусобақани якунлади.
Изоҳ (0)