7-oktyabr kuni O‘FA rahbariyati hamda bosh murabbiy Xose Venansio Lopes ishtirokida O‘zbekiston jamoasining Jahon chempionatidagi ishtirokiga bag‘ishlangan yig‘ilish o‘tkazildi. Unda jamoa bosh murabbiyi bilan shartnoma yakuniga yetgani ma’lum qilindi.
-RuPf8wI5.jpg)
“Terma jamoa o‘yinidagi kamchiliklar tahlil qilinib, ularni bartaraf etish masalalari muhokama qilindi. Yo‘l qo‘yilgan kamchiliklarni bartaraf etish bo‘yicha zarur choralar ko‘rish, terma jamoaga nomzod futbolchilarni yetkazib berish yo‘lida turli yosh toifasida futzal terma jamoalarini tashkil etish, klublar o‘rtasidagi turnirlarni ko‘paytirish bo‘yicha takliflar berildi.
O‘z navbatida Xose Venansio O‘FA rahbariyatiga terma jamoa bosh murabbiyi sifatida ishlash imkoniyat berilgani uchun minnatdorchilik bildirdi va O‘zbekistondagi faoliyati davomida zavq bilan ishlagani, barcha mutaxassislar unga ko‘maklashganini aytib, kelgusida do‘stona aloqalarni saqlab qolib, har qanday yordamga tayyor ekanini ma’lum qildi.
O‘FA birinchi vitse-prezidenti Ravshan Ermatov ispaniyalik mutaxassisga terma jamoadagi faoliyati uchun minnatdorchilik bildirib, unga omad tiladi.
Xose Venansio Lopes bilan tuzilgan shartnoma yakunlandi”, deyiladi matbuot xizmati xabarida.
Murabbiy 2023-yil 20-sentyabrdan O‘zbekiston milliy futzal terma jamoasi bosh murabbiyi sifatida ishlab kelmoqda. Xose Lopes boshchiligida O‘zbekiston jamoasi Tailandda o‘tkazilgan Osiyo chempionatida uchinchi o‘rinni qo‘lga kiritdi.
Toshkentda o‘tkazilgan futzal bo‘yicha Jahon chempionati O‘zbekiston uchun omadsiz keldi. A guruhidan o‘rin olgan mezbonlar 3 uchrashuvning 1 tasida durang o‘ynadi va ikki uchrashuvda mag‘lubiyatga uchrab, musobaqani yakunladi.
Izoh (0)