Футзал бўйича Жаҳон чемпионати. Ўзбекистон йирик ҳисобда мағлубиятга учради

Футзал бўйича Жаҳон чемпионати гуруҳ баҳсларининг 2-тур учрашувлари давом этмоқда.

Тошкентда бўлиб ўтаётган баҳсда Ўзбекистон Парагвай жамоаси билан куч синашди. Учрашувнинг биринчи бўлими шиддатли кечди. Учрашувнинг 16-дақиқасида Парагвай жамоасининг 14-рақамли ўйинчиси ажойиб зарба йўллаб ҳисобни очди. Бир дақиқа ўтиб меҳмонларнинг 10-рақамли ўйинчиси Арналдо Биаз ҳисобни 0:2 кўринишига олиб келди. 

Бўлим шу ҳисобда якунига етди.

Иккинчи бўлим ўзбекистонликларнинг устунлигида бошланди. 24-дақиқада қарши ҳужумга ўтган парагвайликлар ҳисобдаги фарқни 3 тага етказди. Учинчи гол муаллифи — Франциско Мартинес. 26-дақиқада Хавиэр Салас Ўзбекистон дарвозасига 4-голни киритди. 

35-дақиқада Ҳусниддин Нишонов Парагвай дарвозасини ишғол қилди. Афсуски бу гол учрашувдаги сўнггиси бўлиб қолди.

Шу тариқа Ўзбекистон футзал терма жамоаси йирик ҳисобдаги мағлубиятни қабул қилиб олди.

Маълумот учун ушбу гуруҳдан ўрин олган яна бир жуфтлик — Нидерландия ва Коста Рика жамоалари ўртасидаги учрашув 2:2 ҳисобидаги дуранг билан якунланган эди.

Ҳозирда мезбонлар ҳисобида 1 очко мавжуд. Ўзбекистон сўнгги турда Коста Рика жамоаси билан куч синашади. Учрашув 20 сентябрь куни бўлиб ўтади. 3-турдаги ғалаба ҳам жамоани кейинги босқичга чиқишига хизмат қилиши мумкин.