Ўзбекистон миллий терма жамоаси бош мураббийи Тимур Кападзе Париждаги Олимпиадада Испанияга қарши ўйиндаги мағлубияти ҳақида фикр билдирди.
“Ўйиндан мамнунман. Йигитлар матонат ва чинакам жамоавий руҳни намоён этишди. Рақибларимиз дунёнинг энг кучли жамоаларидан бири эди. Аммо сўнгги дақиқаларгача қаттиқ кураш олиб борилди. Ўйинда биз барча ўзбекистонликларнинг қўллаб-қувватлашини ҳис қилдик. Жамоага ишонган барчага раҳмат айтамиз!” дея Тимур Кападзе сўзларини келтиради журналист Никита Макаренко ўзининг Telegram каналида.
Маълумот учун, Ўзбекистон Олимпия терма жамоаси Испания билан ўйинда 1:2 ҳисобида мағлубиятга учради.
Учрашувнинг 28-дақиқасида испанлар ҳимоячиси Пубилл ҳисобни очди. Бўлим охирида Элдор Шомуродов пенальтини аниқ амалга ошириб, ҳисобни тенглаштирди. Қайд этиб ўтиш лозим ушбу гол Ўзбекистоннинг Олимпиадалар тарихидаги илк голи сифатида тарихдан жой олди.
Иккинчи бўлимда эса испанлар пенальти ишлаб олди. Бироқ Абдувоҳид Неъматов ушбу пенальтини қайтара олди. 62-дақиқада эса айнан пенальтидан унумли фойдалана олмаган Серхио Гомес жамоасининг иккинчи голига муаллифлик қилди.
Учрашув якунига қадар шу ҳисоб сақланиб қолди ва Ўзбекистон 1:2 ҳисобида имкониятни бой берди.
Гуруҳнинг иккинчи жуфтлигида Миср ва Доминикан Республикаси жамоалари муроса йўлини (0:0) танлади.
Изоҳ (0)