Ўзбекистон U-23 терма жамоаси бош мураббийи Тимур Кападзе эртанги ўйин олдидан ўз фикрларини билдириб ўтди.
Бош мураббий Нант шаҳрида бўлиб ўтадиган учрашувга бир йўқотиш билан тайёргарлик кўраётганини таъкидлади.
Кеча Нант шаҳрига етиб келдик, тайёргарликни давом эттирмоқдамиз. Олдимизда Мисрга қарши учрашув кутиб турибди. Энг асосийси — ҳамма соғ-саломат, бироқ битта йўқотишимиз бор. Ҳимоячимиз Иброҳимҳалил оилавий сабабларга кўра терма жамоа ихтиёрини тарк этишга мажбур бўлди. Лекин шунга қарамасдан режа бўйича машғулотларни давом эттиряпмиз ва эртанги учрашувда ғалаба қозонишга ҳаракат қиламиз.
Мураббийнинг фикрича галдаги рақиб Африканинг энг кучли жамоаларидан бири.
Мисрга келадиган бўлсак, Африканинг энг кучли жамоаларидан бири. Улар билан ўтган йили Тошкентда ўйнаганмиз. Рақибимизнинг кучли томонлари ва имкониятларини яхши биламиз. Шунга яраша биз ҳам ўз режамизга кўра тайёргарлик кўрамиз ва ғалаба қозониш учун бор имкониятимизни ишга соламиз.
Кападзе илк учрашувдан кейин жамоа ўйинини таҳлил қилгани ва камчиликлар кўзга ташланганини эътироф этди.
Биринчи учрашувдан кейин ўйинимизни таҳлил қилиб чиқдик ва ўзимизга керакли бўлган хулосаларни чиқардик. Ўйин давомида баъзи вазиятларда яхшироқ ўйнадик, баъзида эса камчиликлар ҳам кўзга ташланди. Бироқ, айтганимдек, хатолар устида ишлаб боряпмиз ва ҳозирда бор эътиборимиз эртанги ўйинга қаратилган.
Жамоада қолган барча соғ, муаммо йўқ. Иброҳимҳалил кетганидан сўнг захира футболчиларимиздан бирини қайдномага киритишга ҳаракат қиляпмиз. Бу борада ташкилий қўмитага сўров юбордик, ҳозирча жавобни кутмоқдамиз.
Иброҳимҳалил ўрнига захира таркибидан Алишер Одилов ёки Беҳрузбек Асқаров таклиф этилиши мумкин.
Маълумот учун, 2-тур доирасидаги Ўзбекистон – Миср учрашуви 27 июль куни соат 20:00да Нант шаҳрида бўлиб ўтади. Ўзбекистон терма жамоаси ушбу учрашувга оқ либосларда майдонга тушади.
Изоҳ (0)