Ўтган ҳафтада Украина қўшинлари Харьков вилоятида ўз позицияларини мустаҳкамлай олди. Бу ҳақда Украина президенти Владимир Зеленский ахборотига таяниб, Deutsche Welle маълум қилди.
Зеленскийнинг сўзларига кўра, Украина армияси Донецк йўналишида, хусусан, Россия қўшинлари сўнгги бир неча кундан бери бостириб киришга уринаётган Часов Яр шаҳри ҳудудларида ҳам ўз позицияларини яхшилаган.
Босқинчилар қуролли кучларимизни заифлаштиришга қаратилган мақсадига эришмаяпти. Жанговар буйруқларни бажаришда, ўз позицияларимизни сақлаб қолишда мард ва матонатли ҳар бир аскар, сержант, ҳар бир офицерга миннатдорлик билдираман, — деди Зеленский.
Украина президенти қутқарувчиларга, тез тиббий ёрдам бригадалари фелдшерларига, шунингдек, Россия ўққа тутилишидан кейин нормал ҳаётни тиклаётган таъмирлаш бригадаларига миннатдорчилик билдирди.
Аввалроқ Россия қўшинлари Украинанинг Харьков вилоятидаги чегара ҳудудларини ўққа тутишни кескин кучайтиргани айтилганди. Улар бир қанча ҳудудларда ҳужум уюштириб, бир қанча аҳоли пунктларини назорат остига олган.
19 май куни Россия армияси Харьков вилоятининг бир қатор қишлоқларига зарбалар берган. Маълумотларга кўра, Харьковдаги отишма натижасида 11 киши ҳалок бўлган.
Путин Россия армияси Харьковни эгаллаш нияти йўқлигини айтган. У ҳужум операциясини Украина армиясининг чегара ҳудудларини ўққа тутгани сабабли Россиянинг Украина билан чегарасида “санитария зонаси” яратиш истаги билан изоҳлаган.
Изоҳ (0)