Шереметево аэропортида Россия ҳудудига кириши тақиқланган 40 нафар Қирғизистон фуқароси бор, деб хабар берди Қирғизистон ТИВ. Департаментнинг таъкидлашича, ватандошлар Қирғизистонга “яқин орада энг биринчи авиарейсларда” етказилади.
Акипресс агентлиги Қирғизистоннинг Москвадаги элчихонасига таяниб, Россияга киришни тақиқлаш қарори миграция қонунчилиги бузилгани учун қабул қилинганини ёзди. Ташқи ишлар вазирлиги хабарига кўра, 26 март куни Қирғизистон элчихонаси ходимлари яна Шереметево аэропортига ташриф буюриб, у ерда Россия ФХХ чегара хизмати ходимлари ва “Аэрофлот” авиакомпанияси вакиллари билан учрашди.
“Россия ҳудудига киритилмаган Қирғизистон фуқаролари озиқ-овқат ва сув билан таъминланаётгани жойида аниқланган. Айни пайтда 40 нафар ватандошимизни ватанга жўнатиш кутилмоқда. Бу фуқаролар энг яқин авиакомпания рейсларида Қирғизистонга етказилади”, дейилади департамент сайтида эълон қилинган хабарда.
25 март куни Қирғизистон Ташқи ишлар вазирлиги ватандошларига узрли сабабларсиз Россияга боришдан вақтинча бош тортишни тавсия қилди. Бу тавсия Crocus City Hallъдаги терактдан сўнг Россия томони томонидан кўрилган хавфсизлик чоралари кучайтирилгани сабабли берилган. Ташқи ишлар вазирлиги Россия Федерациясида икки ёки ундан ортиқ марта маъмурий ҳуқуқбузарлик содир этган фуқароларга салбий оқибатларнинг олдини олиш учун мамлакатга қайтмасликни тавсия қилди.
Изоҳ (0)