Sheremetyevo aeroportida Rossiya hududiga kirishi taqiqlangan 40 nafar Qirg‘iziston fuqarosi bor, deb xabar berdi Qirg‘iziston TIV. Departamentning taʼkidlashicha, vatandoshlar Qirg‘izistonga “yaqin orada eng birinchi aviareyslarda” yetkaziladi.
Akipress agentligi Qirg‘izistonning Moskvadagi elchixonasiga tayanib, Rossiyaga kirishni taqiqlash qarori migratsiya qonunchiligi buzilgani uchun qabul qilinganini yozdi. Tashqi ishlar vazirligi xabariga ko‘ra, 26-mart kuni Qirg‘iziston elchixonasi xodimlari yana Sheremetyevo aeroportiga tashrif buyurib, u yerda Rossiya FXX chegara xizmati xodimlari va “Aeroflot” aviakompaniyasi vakillari bilan uchrashdi.
“Rossiya hududiga kiritilmagan Qirg‘iziston fuqarolari oziq-ovqat va suv bilan taʼminlanayotgani joyida aniqlangan. Ayni paytda 40 nafar vatandoshimizni vatanga jo‘natish kutilmoqda. Bu fuqarolar eng yaqin aviakompaniya reyslarida Qirg‘izistonga yetkaziladi”, deyiladi departament saytida eʼlon qilingan xabarda.
25-mart kuni Qirg‘iziston Tashqi ishlar vazirligi vatandoshlariga uzrli sabablarsiz Rossiyaga borishdan vaqtincha bosh tortishni tavsiya qildi. Bu tavsiya Crocus City Hall’dagi teraktdan so‘ng Rossiya tomoni tomonidan ko‘rilgan xavfsizlik choralari kuchaytirilgani sababli berilgan. Tashqi ishlar vazirligi Rossiya Federatsiyasida ikki yoki undan ortiq marta maʼmuriy huquqbuzarlik sodir etgan fuqarolarga salbiy oqibatlarning oldini olish uchun mamlakatga qaytmaslikni tavsiya qildi.
Izoh (0)