Ўзбекистонда нишонланадиган байрам тадбирлари давомида хавфсизликни таъминлашга қаратилган чора-тадбирлар аксарият кишиларнинг норозилиги ва энса қотиришига сабаб бўларди. Кеча Москвада содир бўлган теракт ҳам айнан шундай тадбирларнинг бирида содир бўлгани ва кўпчиликнинг ўлими, жароҳат олишига олиб келгани бу каби хавфсизлик чоралари нақадар зарур эканини исботлаб бергандек гўё. “Дарё” журналисти билан суҳбатда бўлган қашқадарёлик отахон тинчлик барча дунё халқларига бирдек зарур эканини гапириб берди.
Кўп гувоҳи бўлганман. Байрам тадбирларига тайёргарлик жараёнларида хавфсизликка жавобгар бўлган Ички ишлар ходимларининг биздан ҳужжат талаб қилиши, хавфсизлик чоралари сабаб тақиқланган ҳаракатларни, жумладан ўтиш мумкин бўлмаган жойга ўтишга уринишимизни қоралаши бизга ёқмайди. Биз, айнан ўзбек халқи тинчлигимиз таъминлангани учун ҳам қўрқмас, ботирдекмиз балки. Лекин хавфсизлик ҳар қандай кўнгилсизликнинг олдини олишини кўп ҳам тушунавермаймиз. Ёки тан олгимиз келмайди. Шу сабабданми бундайин тадбирларни унча хушламаймиз. Аммо кеча Москвада содир бўлган теракт хавфсизлигимизни таъминловчилар тўғри йўлда эканини исботлаб берди, — дейди Парда бобо.
Отахон ёшлар кўпинча тинчлик сўзини кулги аралаш тилга олаётганини, унинг туб моҳиятини тўғри англамаётганини айтмоқда.
Тинчлик деганда ўзгаларни безовта қилмаслик, тадбирларни тинч ва осойишта, уруш-жанжалсиз ўтказишни, ҳаёт ва турмуш тизимининг бир меъёрда бўлишини тушунамиз. Оилада тинчлик ва осойишталик ҳукм сурса, оила бардавом ва мустаҳкам бўлади. Эл-юртда тинчлик ва осойишталик давом этса, мамлакат тараққиёти, фаровонлиги, юрт аҳлининг турмуши обод бўлади. Буларни акс эттирувчи муқаддас қадриятларимиз, миллий урф-одат ва расм-русумларимиз, динимиз бевосита хотиржамлик силсиласига узвий боғлиқдир. Оила ва юрт нотинч бўлса, тўй-томоша, кўнгилхушлик, ҳазил-мутойиба, ҳаёт лаззатини тасаввур қилиб бўлмайди. Инсон бирор луқмани хотиржам ютмайди, ҳар қандай кошона уй-жой, мол-мулк, бола-чақа инсон танасига оғирлик қилади, — дейди суҳбатдош.
Манбаларда келтирилишича, нотинчлик, уруш сабабидан охирги беш минг йилда уч миллиарддан зиёд одам ҳаётдан кўз юмган.
Урушлар сабабидан меҳр-оқибат, инсонийлик унутилади. Ҳар қандай эзгу амаллар, улуғ мақсадлар поёнига етмайди. Демак, хотиржамлик, осойишталик неъматини сўрашликда доно халқимиз нечоғлик тўғри ва гўзал йўл танлаган. Муқаддас динимиз дастури бўлмиш Қуръон оятларида тинчлик-осойишталикка катта эътибор қаратилиб: “Қачон (Биз) инсонга (тинчлик, саломатлик, фаровонликни) инъом этсак, у (шукр қилишдан) юз ўгириб, ўз ҳолича кетур. Қачон унга (хасталик, камбағаллик каби) бирор ёмонлик етса, ноумид бўлур (Исро, 83)”,— деб марҳамат қилинади. Яратган бандаларини ўзаро иттифоқликда, аҳилликда, тинчлик-омонликда яшашга даъват этиб: “Агар мўминлардан икки тоифа ўзаро уришиб қолсалар, дарҳол улар ўртасини ислоҳ этингиз! (Ҳужурот, 9)”, — дея хитоб қилади. Юртимизда тинчлик-осойишталик барқарорлигини таъминлаш йўлида давлатимиз томонидан катта иш олиб борилаётгани бизнинг бахтимиздир. Шунга кўра, биз ҳам тинч, осойишта ва фаровон ҳаётнинг қадрига етиш, осуда турмушимизнинг барқарорлигини таъминлашда ўз ҳиссамизни қўшмоғимиз лозим. Бу орқали ҳаётимиз фаровонлигига эришамиз, — дейди суҳбатдош отахон.
Суҳбатдош инсонлар мавжуд тинчликнинг қадрига етиб, шукрини адо этишлари, ношукрлик қилмасликлари лозимлигини айтмоқда.
Минг афсуски, бугунги тўкин-сочинлик кунларда ҳам кўпгина ёру-биродарларимизни нолиётганига гувоҳ бўламиз. Ахир, етти мучаси соғ одам ҳамёнида маблағи йўқ бўлса, шунга нолиши керакми? Бориб, шифохоналарда қўл-оёғи йўқ ёки хасталаниб, ажалини кутиб ётган беморларни кўрсин-да, қандай буюк неъмат соҳиби эканлигини ҳис қилсин. Уй-жойлари эскириб қолганига нолиётганлар эса, уй-жойсиз, ижарама-ижара ёки олисда Ватангадо бўлиб юрганларни кўрсин. Зеро, неъматлар ниҳоятда кўп, энг буюк неъмат – иймон, илм неъматларидир. Шуни ёдда тутишимиз зарурки, иймоннинг нури зиёда бўлиши, илм-маърифатнинг зиёда бўлиши учун яна бир неъмат бор. Биласизми бу нима? Ҳаловат неъмати. Бизга берганига шукр қилсак, Аллоҳ янада зиёда қилади. Банда икки қоидани билиб олиши керак, яъни бир инсонга икки қанот керак, биласизми у нима? Бири шукр, иккинчиси сабрдир. Масалан: машаққат устида сабр қилиб, борига шукр қилсак, Яратган Ўзининг фазли ила енгиллик ато қилади. Енгилликда ҳам шукр қилсак, Аллоҳ янада зиёда қилади. Бизнинг ҳамёнимиз сабр ва шукр бўлсин. Аллоҳ таоло тинчлик неъматини берди дегани энди бу неъматга шукр қилиш керак дегани. Акс ҳолда буларни биздан олиб қўйиши мумкин. Тинчлик неъмати бўлса, ибодатимиз ҳаловатли, ҳаётимиз фаровон, келажагимиз порлоқ бўлади. Шундай экан, инсонлар нафақат мавжуд тинчликнинг қадрига етиб, шукрини адо этишлари, балки унга ношукрлик қилиб путур етказишдан ҳам сақланиши лозим. Зеро, тинчлик ва хотиржамликнинг улуғ неъматлиги доимо кундалик хайриятларимизнинг бошида эсланади. Шундай экан, Яратгандан бир-биримизга тинчлик, офият, хотиржамлик тилайлик. Аллоҳ таоло тинчлик-осойишталигимизни ҳамиша барқарор, юртимизни тинч, меҳнатсевар халқимиз ҳаётини фаровон айласин, — дейди суҳбатдош.
Изоҳ (0)